ئەندامێکی مەکتەبی سیاسی پارتی رایگەیاند، كۆبوونەوەی ئەمڕۆی نێوان پارتی و یەكێتی لەسەر داواكاریی یەكێتی دواخراوە، بەڵام کۆبوونەوەکە هەر دەکرێت. کاکەمین نەجاڕ، ئەندامی مەکتەبی سیاسی پارتی بە میدیای حزبەکەی راگەیاند، “كۆبوونەوەی ئەمڕۆی نێوان پارتی و یەكێتی لەسەر داواكاریی یەكێتی دواخراوە. دەشڵێت، “بە گشتی پەیوەندییەكانمان لەگەڵ یەكێتی باشن و كۆبوونەوەكەش هەر ئەنجام دەدرێت، بەڵام دیار نییە چ رۆژێك دەبێت”. راشیگەیاند، “بڕیاربوو ئەمڕۆ پارتی دیموكراتی كوردستان و یەكێتی نیشتیمانیی كوردستان لەسەر كۆمەڵێك پرس كۆببنەوە، لەوانەش پەیوەندییەكانی نێوان هەردوو حزب و بابەتی لامەركەزیی ئیداری و پەیوەندییەكانی نێوان هەولێر و بەغدا و دۆخی ناوچەكە، بەڵام لەسەر داواكاریی یەكێتی، كۆبوونەوەكەی ئەمڕۆ دواخراوە”. لەبارەی پەیوەندییەكانی نێوان هەردوولاشەوە، ئاماژەی بەوەکردووە، “بە گشتی پەیوەندییەكان لە ئاستێكی باشدان و ڕای جیاوازیش هەیە، ئێمە پەیوەندییەكانمان باشە و پێكەوە لە حكومەتین و پێكەوەش كار دەكەین، بۆیە ئاساییە ئەگەر ڕای جیاوازیش لەسەر زۆر پرس هەبێت”. ئەو ئەندامەی مەكتەبی سیاسیی پارتی باس لەوەدەکات، “ئەو كێشانە، یان ئەو ڕا جیاوازانەی لە نێوان پارتی و یەكێتیدا هەن، قابیلی گفتوگۆ و چارەسەرن و هەردوولا بە دیالۆگ چارەیان دەكەین، لەگەڵ ئەوەشدا نین شتەكان گەورە بكرێن، چونكە دۆخی كوردستان و ناوچەكە، ئەوەمان لێ دەخوازێت”. وابڕیاربوو ئەمڕۆ شەممە، یەکێتی و پارتی لەسەر ئاستی بەرپرسانی باڵای حزبەکانیان کۆببنەوە.
