پێشنیازێک بۆ بڕینی 10%ی مووچەی مووچەخۆران ئاشكرا دەبێت

شوان به‌رزنجی

پێشنیازێک بۆ بڕینی 10%ی مووچەی مووچەخۆران ئاشكرا دەبێت

پێشنیازێک ئاشکرا دەبێت کە بەپێی پێشنیازەکە بڕیارە 10%ی مووچەی فەرمانبەرانی عێراق وەکوو پاشەکەوتی ناچاری تا کۆتایی ئەمساڵ، ببڕدریت.

جەمال کۆچەر، ئەندامی لیژنەی دارایی لە ئەنجوومەنی نوێنەرانی عێراق، رای گەیاند، پێشنیازێکی سەرۆکی پەرلەمانی عێراق هەیە بۆ بڕینی 10٪ی مووچەی فەرمانبەرانی عێراق و پێشنیازەكە وەکوو پاشەکەوتی ناچاری تا کۆتایی ئەمساڵ دەبێت، ئەو بڕینە تا ئێستا تەنها پێشنیازە و پێویستی بە داڕشتنی یاسا، یان بڕیار و رەزامەندی حکوومەت و دەنگدانی پەرلەمان هەیە”.

كۆچەر، بە ڕۆژنامەی (سەباح)ی فەرمی عێراقی ڕاگەیاندووە، دەكرێت بۆ چارەسەری قەیرانی دارایی بانکی ناوەندی قەرز بە حکوومەت بدات و گوتی: “بانکی ناوەندی دەتوانێت چارەکێک ملیار دۆلار بداتە حکوومەت بەبێ ئەوەی کاریگەریی لەسەر بەهای دراو دروست بکات”.

بەهۆی دابەزینی نرخی نەوت و ڤایرۆسی كۆڕۆناوە، عێراق داهاتێكی زۆری لەدەست داوە، بۆیە كێشەی لە دابەشكردنی مووچە بۆ دروست بووە.

لەمبارەوە حەسەن كەعبی، جێگری یەكەمی سەرۆكی پەرلەمانی عێراق رای گەیاندووە: “عێراق لە دۆخێكی خراپ و قەیرانی داراییدایە، پەرلەمان و حكوومەت كار دەكەن بۆ ئەوەی چارەسەرێكی ئەو دۆخە بكەن، بەتایبەت بۆ مووچەی فەرمانبەران”.

وەزیری دارایی عێراق لە پەیامێکدا رای گەیاندووە: “ئەم حکوومەتە تووشی قەیرانی جدی بووەتەوە، دەوڵەت پێویستی بە چاکسازی هەیە لە بواری ئابوورییدا.”