حكومەتی عیراق داوا لە كۆمپانیا بیانییەكانی نەوت دەكات خەرجییەكانیان كەم بكەنەوە و پێدانی حەقدەستەكانیشیان دوابخەن، پرۆژەیاسای بودجەی هەموار دەكاتەوە و نرخی نەوت بە 25 دۆلار هەژماردەكرێت. لەو بارەیەوە مەزهەر محەمەد ساڵح راوێژكاری مستەفا كازمی سەرۆك وەزیرانی نوێی عێراق لە لێدوانێكی رۆژنامەوانیدا باسی لە هەوڵەكانی حكومەت كردووە بۆ كەمكردنەوەی لێكەوتەكانی قەیرانی دارایی و رایگەیاندوە، لەگەڵ كۆمپانیا نەوتییەكان سەرقاڵی دانوستانن بۆ ئەوەی پێدانی حەقدەستەكانیان دوابخەن، كە بەغدا ناچارە مانگانە 1 ملیار دۆلار بداتە ئەو كۆمپانیایانە، هەروەها پێشتریش داوایان لێكراوە بە خەرجییەكی كەمتر نەوت بەرهەمبهێنن و خەرجییەكانیان كەمبكەنەوە. راوێژكارەكەی سەرۆك وەزیران راشیگەیاندووە، حكومەتی عێراق بۆ دابینكردنی موچە و خانەنشینی و پاڵپشتییە داراییەكانی دیكە، مانگانە لانیكەم پێویستی 5 ملیار و 500 ملیۆن دۆلارە، بۆیە ناچارن خەرجییەكانیان كەمبكەنەوە، یان دەبێت لە سەرچاوەیەكەوە قەرز وەربگرن. راوێژكارەكە ئاشكراشیكردووە، دەبێت پرۆژەیاسای بودجەی 2020 هەمواربكرێتەوە و نرخی نەوت زیاتر نەبێت لە 25 دۆلار، كە بەو شێوەیەش پێشبینی دەكەن بودجەكە بە بڕی 25 ملیار دۆلار كورتهێنانی بۆ دروستبێت.
