وەزارەتی پەروەردەی حكومەتی عیراق چارەنوسی خوێندنی ئەمساڵی پۆلە ناكۆتاكانی لە قۆناغەكانی سەرەتایی و ناوەندی و دواناوەندی یەكلاكردەوە و بەپێی بڕیارەكە نمرەی كۆتایی وەرزی یەكەم بۆ كۆتایی وەرزی دووەمیش هەژمار دەكرێت.
لەوبارەیەوە وەزارەتی پەروەردەی عیراق لەبەیاننامەیەكدا بڵاویكردوەتەوە، دەستەی بیروڕا بە سەرۆكایەتی عەلی حەمید خەڵەف وەزیری پەروەردە كۆبوەتەوە بۆ گفتوگۆكردن لەسەر چەند بابەتێك لەوانەش چارەنوسی پۆلە ناكۆتاكان لە قۆناغەكانی سەرەتایی و ناوەندی و دواناوەندی.
رونیشكراوەتەوە، بڕیاردراوە نمرەی وەرزی یەكەم بۆ خوێندنی ئەمساڵ (2019 – 2020) وەك نمرەی دەرچونی كۆتایی ساڵ هەژمار بكرێت، هەروەها ئەوانەی كەوتون رێگەیان پێدەدرێت دواتر تاقیكردنەوەی خولی دووەم لە سەرجەم ئەو مادانەدا بكەنەوە، كە تێیدا دەرنەچون.
هەروەها بڕیاریشدراوە پشت بە نمرەی وەرزی یەكەم دەبەسترێت بۆ قۆناغەكانی خوێندنی پیشەیی و پەیمانگاكانی هونەرە جوانەكان وەك نمرەی دەرچون، ئەو خوێندكارانەشی دەرنەچون بەهەمان شێوە رێگەیان پێدەدرێت تاقیكردنەوەی خولی دووەم ئەنجامبدەن.
وەزارەتی پەروەردەی عیراق تەئكیدی لەوەشكردوەتەوە، دەستەكە بڕیاری داوە كرێی خوێندنی خوێندنگا ئەهلیەكانی دەرەوە و ناوەوەی عیراق بە رێژەی 10% بۆ ساڵی خوێندنی 2019 – 2020 كەمبكاتەوە.
