ئەندامێكی ئەنجومەنی سەركردایەتیی یەكێتی دەڵێت، بەهۆی دوو ئاراستەیی پارتییەوە لە هەڵوێستی ئەو حزبە بەرامبەر بە یەكێتی تێناگەن، ئاشكراشیكرد، پارتی دەیەوێت وای پیشانبدات جیاوازی دەكەن لەنێوان هاوسەرۆكەكانی یەكێتی و تەنها پەیوەندی دەكەن بە هاوسەرۆكێكیانەوە.
لە گفتوگۆیەكدا لەگەڵ بەشی كوردی دەنگی ئەمریكا، ئارێز عەبدوڵڵا ئەندامی ئەنجومەنی سەركردایەتیی یەكێتیی نیشتمانیی كوردستان وتی “بەهیچ شێوەیەك لەهەڵوێستی پارتی بەرامبەر یەكێتی تێناگەین، بێسەروبەرییەكی زۆر لە بۆچونەكانی سەركردەكانیان هەیە، جیاوازێكی زۆر لەنێوان هەردوو باڵ و ئاراستەی ناو پارتی هەستی پێدەكرێت، هەر ئاراستەیەك بۆچونی خۆی دەردەبڕێت و ڕەنگی داوەتەوە، ئەوەش وایكردووە سەر لە كادیرەكانیشیان بشێوێت، تەنانەت ئێستا وایلێهاتووە یەكێتی نازانێت لەگەڵ كام ئاراستەیەی پارتی كۆببێتەوە و كامیان تەمسیلی پارتی دەكەن”.
سەبارەت بە تۆمەتباركردنیان بە بەشداری لەخۆپیشاندانەكانی دهۆك، ئارێز عەبدوڵڵا بە دەنگی ئەمریكای وتوە “ئەگەر ئێمە بڕیار بدەین خۆپیشاندان بكەین، ئەوا بە بڕیارێك لە حكومەت دەكشێینەوە و لە پایتەختی هەولێر خۆپیشاندان دەستپێدەكەین، نەك لە دهۆك، بەدڵنیاییەوە لە هەولێرەوە تەخت و تاراجی ئەو حكومەتە دەڕوخێنێت”.
ئەو ئەندامەی سەركردایەتیی یەكێتی ئاشكراشیكرد، “پارتی دەیەوێت وای پیشان بدات جیاوازی دەكەن لەنێوان هاوسەرۆكەكانی یەكێتی و پەیوەندی دەكەن بە هاوسەرۆكێكەوە، بەڵام لەگەڵ هەركامیان كۆببنەوە سیاسەتی یەكێتی دەردەبڕێت”.
