مەلا بەختیار ئەندامی ئەنجومەنی باڵای سیاسی و بەرژەوەندیی یەكێتی پشتگیریی لامەركەزیەتی دارایی و ئیداری دەكات، بەڵام بەو مەرجەی هیچ لایەنێك نەیبات بەرەو دوو ئیدارەیی و فرە ئیدارەیی، پێشی وایە لە كۆنگرەی داهاتوی پارتی-دا گۆڕانكاری رودەدات.
مەلا بەختیار لە گفتوگۆیەكدا لەگەڵ ماڵپەڕی “شەفەق نیوز” رایگەیاندوە، لەگەڵ لامەركەزیدایە لە هەرێمی كوردستان، بە لامەركەزی وەكو دەسەڵاتی دارایی و ئابوری و دەسەڵاتی چۆنێتیی بەڕێوەبردنی پارێزگاكان بەشێوەیەكی باشتر، بەڵام لە چوارچێوە و ئاراستەیەكی دیاریكراودا و سەرنەكێشێت بۆ دوو ئیدارەیی.
هەروەها دوپاتیكردوەتەوە، نابێت هیچ لایەنێك لامەركەزی و دۆخەكە بەرێت بەرەو سەپاندنی دوو ئیدارەیی و فرە ئیداریی لە هەرێمی كوردستاندا، چونكە ئەوە گەورەترین هەڵەی ستراتیژییە هەر لایەنێك ئەنجامی بدات و هەر لایەنێكیش پێی رازی بێت.
ئەندامەكەی ئەنجومەنی باڵای سیاسی و بەرژەوەندیی یەكێتی دان بەوەشدا دەنێت، كە قۆناغی ئەوەی هەریەك لە جەلال تاڵەبانی و مەسعود بارزانی كۆببنەوە و كێشەكان چارەسەر بكەن، كۆتایی هاتوە.
مەلا بەختیار دەشڵێت “پێكهاتەی یەكێتی گۆڕانكاریی بەسەردا هاتوە، لە كۆنگرەی داهاتوی پارتیشدا گۆڕانكاری لەناو حزبەكەدا دێتەئاراوە”.
راشیگەیاندوە، زانیاریی وردی هەیە، كە لە چەند لایەكەوە هەوڵ هەیە بۆ ئەنجامدانی كۆبونەوەی نێوان یەكێتی و پارتی لە دوای كۆتایی جەژنی رەمەزان.
