ژمارەیەك كۆمپانیای گەیاندن و ئینتەرنێت لە هەرێمی كوردستان بەڵێنیان داوە، نرخی ئینتەرنێت بە رێژەی 25% كەمبەكەنەوە و خێراییەكەشی بە رێژەی 100% زیادبكەن.
ئانۆ جەوهەر وەزیری گواستنەوە و گەیاندنی حكومەتی هەرێم لە تۆمارێكی ڤیدیۆییدا چەند پرسێكی تایبەت بە نرخ و خێرایی ئینتەرنێت و باجی سەر كۆمپانیاكانی پەیوەندی خستەڕو و وتی “داوامان لە سەرجەم كۆمپانیاكانی گەیاندن و ئینتەرنێت كردووە، خێرایی ئینتەرنێت بەرزبكەنەوە و نرخەكەشی كەمبكەنەوە، لەو چوارچێوەیەدا ژمارەیەك كۆمپانیا بەڵێنیان پێداوین، نرخی ئینتەرنێت بە رێژەی 25% كەمدەكەنەوە و خێراییەكەشی بە رێژەی 100% زیاد دەكەن”.
سەبارەت بە نرخی كارتی مۆبایلیش وەزیری گواستنەوە و گەیاندنی هەرێم رایگەیاند، ئەو بابەتە پەیوەندی بە حكومەتی فیدراڵەوە هەیە و حكومەتی هەرێم هیچ دەسەڵاتێكی لەو پرسەدا نییە، چونكە لە یاسای بودجەی ساڵی 2015ی عیراق‌دا جێگیركراوە، كە پێویستە كۆمپانیاكانی مۆبایل و ئینتەرنێت رێژەی لە 20%ی فرۆشەكانیان وەك باج بە حكومەتی فیدراڵ بدەن، لەبەرئەوەی گرێبەستی ئەو كۆمپانیایانە لە بەغدا و لەگەڵ حكومەتی عیراق كراون.
ئاماژەی بەوەشدا، ئێستا وەزارەتی گواستنەوە و گەیاندنی حكومەتی هەرێم لە هەوڵی ئەوەدایە، ئەو رێژەی لە 20%ی وەك باج لە هاووڵاتیانی هەرێمی كوردستان وەردەگیرێت، بگەڕێتەوە بۆ گەنجینەی حكومەتی هەرێم نەك بچێتەوە بۆ بەغدا، چونكە باجەكە لەسەر شانی هاووڵاتیانی هەرێمە و پێویستە داهاتەكەشی بۆ گەنجینەی حكومەتی هەرێم بێت و لە كەرتی خزمەتگوزاری بۆ هاووڵاتیان خەرج بكرێت.
