مەسرور بارزانی، سەرۆكی حكومەتی هەرێمی كوردستان لە بارەی تەشەنەكردنی زیاتری پەتای كۆرۆنا پەیامێكی راگەیاند.
دەقی پەیامەكە
هاونیشتمانیانی بەڕێز،
مەترسیی پەتای كۆڕۆنای نوێ (كۆڤید-19) زۆر جیددیە و لەم ڕۆژانەدا بە هۆی سستیی پابەندبوون بە رێنماییە تەندروستییەكان ، خەریكە ئەم پەتایە دیسان بە خێرایی بڵاودەبێتەوە.
ئێمە لە سەرەتای بڵاوبوونەوەی ئەم پەتایەدا، داوامان لە هاووڵاتییانی خۆشەویست كرد، كە پابەندی رێنماییە تەندروستییەكان بن و سوپاسیشتان دەكەم، كە پابەند بوون و بە شێوەیەكی زۆر باش ڕێگە لە بڵاوبوونەوەی پەتاكە گیرا و ئەم سەركەوتنە بووە جێگەی باس و سەرنجی زۆر وڵات و رێكخراوی نێوەدەوڵەتی.
بەڵام بەداخەوە ئێستا ئەم پابەندبوونە سستیی تێكەوتووە، هەندێ لایەنیش هەوڵی بە سیاسیكردنی ئەم هەوڵانەی حكومەتیان داوە و ویستوویانە رێنماییە تەندروستییەكان بێ نرخ و بێ سوود پێشان بدەن و بەداخەوە ژیانی ھاووڵاتیانیان بۆ خزمەتی ئامانجە سیاسییەكانیان خستووەتە مەترسییەوە. ئێستا ئەوانەی كە دژ بە ڕێنماییەكانی تەندروستی هەڵسوكەوتیان كردووە و خەڵكیان هان دەدا پابەندی رێنماییەكان نەبن، دەبێت بەرپرسیاریەتی خستنە مەترسیی گیان و تەندروستیی ئەم خەڵكە بگرنە ئەستۆ و كۆتایی بە یاری كردن بە ژیانی خەڵك بێنن.
من جارێكی دیكە داوا لە هەموو خوشك و برا هاونیشتمانیەكانم دەكەم پابەندی رێنماییە تەندروستیەكان بن و تەندروستیی خۆیان و كەسوكاریان و خەڵكی تریش، لە ژێر كاریگەریی ئەو پرۆپاگەندانە مەخەنە مەترسییەوە.
سەلامەتیی ئێوە بۆ ئێمە لە هەموو شتێك گرینگترە.
مەسرور بارزانی
سەرۆكی حكومەتی ھەرێمی كوردستان
2020/5/29
