ئەدهەم ئیسماعیل نوێنەری رێكخراوی تەندروستیی جیهانی لە عیراق هۆشداری دەدات لە شەپۆلی دووەمی ڤایرۆسی كۆرۆنا و دەڵێت “دەوڵەتانی دراوسێی عیراقی گرتوەتەوە، بۆیە نابێت پەلە بكرێت لە دەستپێكردنی ئاڵۆگۆڕی بازرگانی لەگەڵ ئەو وڵاتانەدا”.
ئەدهەم ئیسماعیل لەلێدوانێكی رۆژنامەوانیدا باسی لەوەكردوە، هەندێك پارێزگای عیراق پەلەیان كرد لە دەستپێكردنەوەی ئاڵوگۆڕی بازرگانی لەگەڵا دەوڵەتانی دراوسێ، بەڵام بوەهۆی بەرزبونەوەی ژمارەی توشبوانی ڤایرۆسی كۆرۆنا.
داواشی كردوە، دەستپێكردنەوەی ئاڵوگۆڕی بازرگانی لەگەڵ ئەو دەوڵەتانەی شەپۆلی دووەمی ڤایرۆسەكە تێیاندا دەستیپێكردوە، دوابخرێت، چونكە ژیانی خەڵك گرنگە و پێویستە قەدەغەی هاتوچۆ بەشێوەیەكی تەواوەتی جێبەجێ بكرێت و سنورەكان لەگەڵ ئەو دەوڵەتانەدا دابخرێن، كە توشبوی زۆری ڤایرۆسەكەیان تێدایە تا ئەوكاتەی كۆنترۆڵ دەكرێت.
تەئكیدیشی كردوەتەوە، رێكخراوی تەندروستیی جیهانی نیگەرانە لە زیادبونی ژمارەی توشبوانی كۆرۆنا لە عیراقدا بەهۆی جێبەجێنەكردنی رێوشوێنەكانی خۆپاراستن بەشێوەیەكی دروست و گومان لە بونی ڤایرۆسەكە، بۆیە بەلایانەوە گرنگە لەروی تەندروستی و ئەمنیشەوە قەدەغە بسەپێنرێت نەك تەنها ئەمنی.
نوێنەری رێكخراوی تەندروستیی جیهانی لە عیراق دەشڵێت “تائێستا هەندێك لە هاووڵاتیان گومانیان لە بونی پەتاكە هەیە و گردبونەوەكان زیادیان كردوە لە یاریگاكان و بۆنە جیاوازەكان و دوركەوتنەوەی كۆمەڵایەتی جێبەجێ ناكرێت، ئەوەش بوەتەهۆی زیادبونی ژمارەی توشبوان”.
