سەرۆكی فراكسیۆنی پارتی دیموكراتی كوردستان لە پەرلەمانی كوردستان رای گەیاند، بەڵگەیان هەیە كە خەڵك بە قاچاغ هێندراوەتەوە تاوەكوو هاووڵاتیانی هەرێمی كوردستان تووشی پەتای كۆرۆنا بكرێن و سەرەنجامیش كارەساتی گەورە بكەوێتەوە و حكوومەت تۆمەتبار بكرێت.
ئومێد خۆشناو، سەرۆكی فراكسیۆنی پارتی لە پەرلەمانی كوردستان، لە میانی دیدارێكیدا لەگەڵ بەشی كوردیی (دەنگی ئەمریكا) رایگەیاند، كۆمەڵێك كەس لە پێناو ناشرینكردنی حكوومەت و بە سیاسیكردنی بابەتەكە، نابەرپرسانە بەرامبەر بە پەتای كۆرۆنا هەڵسوكەوتیان كردووە و بوونەتە هۆی ساردكردنەوەی خەڵك لە خۆپارێزی.
ئومێد خۆشناو ئاشكرای كردووە: ”ڕێ و شوێنەكان گیرابوونە بەر بۆ ئەوەی هاتوچۆ نەبێت، بەداخەوە لە سنوورەكان بە قاچاغ خەڵك داخڵی كوردستان كران. بەداخەوە خەڵكیش لە دەرەوە گەڕایەوە و كوارەنتین نەكرا، ئەمە بووە هۆكاری تێكەڵ بوونی هەموو چین و توێژەكان و ئەوەی لێدروستبوو، ئێمە پێمانوایە تەنها لە پێناو ناشیرینكردنی حكوومەت و ئەزموونی هەرێمی كوردستان ئەو كارە كراوە، كە دواجار گەلی كوردستان باجەكەی دا، چاوەڕوانی ئەوەش دەكەین ئەو كارەساتەی كە بەسەر گەلی ئێمەدا هاتووە، زیاد ببێت، لە كاتێكدا ئەگەر خۆپارێزییەكانی سەرەتای ڕێ و شوێنەكانمان بگرتایە بەر و بەردەوام بووینایە، هیچ دەروازەیەك نەمابوو كۆرۆنا لە دەرەوە بتواندرێت بێتە ناو هەرێمی كوردستان”.
دووپاتیشی كردووەتەوە كە ئەوان بەڵگەیان لەبارەی بەقاچاغ هێنانەوەی خەڵك هەیە و نەیشاردووەتەوە كە ئەوانەی ئەم كارەیان كردووە و خەڵكیان لە خۆپارێزی سارد كردووەتەوە، لە ئێستاوە خۆیان بۆ دوای سێ مانگی دیكە ئامادە كردووە تاوەكوو بابەتەكە بخەنە ئەستۆی حكوومەت و تۆمەتەكە بدەنە پاڵ حكوومەت.
