پەرلەمانتارێكی پێشووتری پارتی رەتیدەكاتەوە خودی حزبەكەی خۆی بەربەست بۆ نێچیرڤان بارزانی وەكو سەرۆكی هەرێم دروست بكات، پێشی وایە، ئەگەر مەسعود بارزانی سەرۆكی پارتی نەبێت، نێچیرڤان بارزانی دەبێتە سەرۆكی حزبەكە.
فازڵ بەشارەتی ئەندامی خولی سێیەمی پەرلەمانی كوردستان لە فراكسیۆنی پارتی، لەمیانی بەشداریكردنی لە گفتوگۆی “نیو كاژێر”ی رادیۆ نەوا، كە تایبەت بوو بە ساڵیادی بوونی نێچیرڤان بارزانی بە سەرۆكی هەرێم، رەتیكردەوە خودی پارتی دیموكراتی كوردستان بەربەستی بۆ كارەكانی نێچیرڤان بارزانی وەكو سەرۆكی هەرێم دروستكردبێت بۆ بەدیهێنانی یەكریزیی لایەنەكان و تێپەڕاندنی قەیرانەكان.
بەشارەتی دوپاتیكردەوە، بە یەك “شاور”ی نێچیرڤان بارزانی تەواوی ئەندام و كادر و سەركردایەتیی پارتی كۆدەبنەوە، ئەگەر وا نەبوایە ئێستا پارتی ببوو بە چەندین باڵ.
فازڵ بەشارەتی لەبارەی ئەگەری بوونی نێچیرڤان بارزانی بە سەرۆكی پارتی لە كۆنگرەی داهاتووی حزبەكەدا رایگەیاند، ئەوە دەگەڕێتەوە بۆ بڕیاری خودی مەسعود بارزانی و رازیبونی كۆنگرە، كێ دەڵێت كۆنگرە قبوڵی دەكات مەسعود بارزانی سەرۆكی پارتی نەبێت؟
بەڵام بەشارەتی بۆچونی وایە، ئەگەر مەسعود بارزانی سەرۆكی پارتی نەبێت، ئۆتۆماتیكی نێچیرڤان بارزانی دەبێتە سەرۆكی حزبەكە.
