پەرلەمانی عیراق دژی هەرجۆرە كەمكردنەوە و لێبڕینێك لە موچەی فەرمانبەران و خانەنشینان وەستایەوە.
بەڕێوەبەرایەتی راگەیاندنی پەرلەمانی عیراق رایگەیاند، “لەدانیشتنی رۆژی چوارشەممەی پەرلەمانی عیراقدا بە زۆرینەی دەنگ بڕیارێك پەسەند كراوە كە تیایدا هەر لێبڕینێك لە مووچەی فەرمانبەران و خانەنشینان ڕەتدەكاتەوە”.
بە گوێرەی راگەیەندراوەكەی راگەیاندنی پەرلەمانی عێراق “لە بڕیارە پەسەندكراوەكەدا دانانی هەر باجێك لەسەر مووچە رەتكراوەتەوە بەو پێیەی نایاساییە و پشت نابەستێت بەهیچ دەقێكی یاسایی”.
راگەیەندراوەكە جەختی لەسەر ئەوە كردۆتەوە كە ئەو بڕیارە سێ سەرۆكایەتییەكە و وەزیر و پەرلەمانتار و پلە تایبەتەكان ناگرێتەوە.
بەهۆی دابەزینی نرخی نەوتەوە حكومەتی عیراق تووشی كورتهێنانی بودجە بووەتەوە و بۆ دابینكردنی موچەی فەرمانبەران ئاستەنگی بۆ دروست بووە.
بەمەبەستی زاڵ بوون بە سەر ئەو كێشە و گرفتانەدا لە ماوەی رابردوودا چەند پێشنیازێك لە ئارادابوون لەوانە وەرگرتنی قەرزی دەرەكی و ناوخۆیی، زیادكردنی باج و كەمكردنەوەی موچە.
