وەزارەتی دارایی: دابەشکردنی موچە دەستپێدەکاتەوە

سەرچاوەیەک لە وەزارەتی دارایی هەرێم رایگەیاند، لە ئیستادا وەزارەتەکە سەرقاڵی ئامادەکارییە بۆ راگەیاندنی لیستێکی نوێی موچە و دەستپێکی دابەشکردنی موچەش وەزارەتی تەندروستی دەبێت. سەرچاوەیەک لە وەزارەتی دارایی بە ئێن ئاڕ تی ڕاگەیاند، دەتوانن بەو بڕە پارەیەی لە بەردەستیاندایە موچەی مانگی شوباتی ئەمساڵی بەشێک لە وەزارەتەکان دابەشبکەن و بەردەوامیش داهاتی ناوخۆ هەیە. وتیشی، بۆ دانوستان لەسەر موچە و بودجەی هەرێم، لەم هەفتەیەدا شاندی هەرێمی کوردستان دەگەڕێتەوە بەغدا. لە ٢٩ی مانگی رابردوودا، حکومەتی عێراق بڕی ٤٠٠ ملیار دیناری بۆ موچەی فەرمانبەرانی هەرێم خستە سەر هەژماری بانکیی حکومەتی هەرێم. لەگەڵ ئەوەشدا، وەزارەتی دارایی هەرێم رایگەیاند، لە ئێستادا بڕی ٢٢٢ ملیار و ٢٧٥ ملیۆن دینار لە کۆی ٤٠٠ ملیارەکەی بەغدا ماوەتەوە. وتیشی، “لە ٤٠٠ ملیارەکە، بڕی ١٦٥ ملیار و ٧٢٥ ملیۆن دینار قەرزی سەرمایەدارانی ناوخۆی لێ گەڕێندراوەتەوە.” ئەمەش لەکاتێکدایە، نزیکەی ٤٠ رۆژە فەرمانبەرانی حوکمەتی هەرێم موچەیان وەرنەگرتووە.