پەرلەمانتارێكی كەركوك رایدەگەیەنێت پاراستنی دۆخی ئەمنی كەركوك و قەزاو ناحیەكانی دەوروبەری لەلایەن سوپای عیراقەوە سەركەوتوو نەبوەو پێویستە پەلە بكرێت لە پێكهێنانی هێزێكی هاوبەش لە نێوان پێكهاتەكانی پارێزگاكە.
ئەڵماس فازل پەرلەمانتاری فراكسیۆنی یەكێتی لە پەرلەمانی عیراق بە میدیای حزبەكەی راگەیاندوە: لەماوەی سێ ساڵی رابردوو بینیمان كە پاراستنی دۆخی ئەمنی كەركوك و قەزاو ناحیەكانی دەوروبەری، لەلایەن سوپای عیراقەوە سەركەوتوو نەبوە.
وتیشی: بەئاشكرا لە چەند شوێنێكی خوارووی پارێزگاكە جموجۆڵی تیرۆرستان دەبینرێیت و ئەوەش بۆتە هۆی ناسەقامگیری دۆخی ئەمنی و دووبارە كوشتنی هاووڵاتیانی بێ تاوان.
بەوتەی ئەو ئەندامەی ئەنجومەنی نوێنەرانی عیراق، كەركوك شارێكی فرە نەتەوەییە و ناكرێیت لەلایەن یەك نەتەوەوە دۆسیەی ئەمنی بەڕێوەببردرێت، كە شارەزای جوگرافیا و كلتووری پارێزگاكەش نین، راشیگەیاند: داوامانكردوە لە حكومەتی عیراق لەگەڵ حكومەتی هەرێم بەهەماهەنگی پەلە بكەن لە پێكهێنانی هێزێكی هاوبەش لە نێوان پێكهاتەكانی پارێزگاكە، ئەوەش بەپێی رێژەی دانیشتوان و بەركەوتەكانی هەڵبژاردن هێزێكی راهێنراو كەركوك بپارێزیت.
