پەیجی بەڕێوەبەرایەتی گشتی كەشناسی و بومەلەرزە زانی هەرێمی كوردستان بڵاویكردووەتەوە، رۆژی یەك شەممە دیاردەی خۆرگیران لە هەرێمی كوردستان رودەدات و داواشدەكات هاووڵاتیان سەیری خۆر نەكەن لەوكاتەدا.
بەڕێوەبەرایەتی گشتی كەشناسی و بومەلەرزە زانی هەرێمی كوردستان رایگەیاندووە، رۆژی یەك شەممە 21-6-2020 خۆرگیرانی نیمچەیی لەهەرێمی كوردستاندا روودەدات و دەستپێكی دیاردەكە لەنێو هەرێمی كوردستان لە كاتژمێر 07:34:52ی بەیانی دیسكی مانگ لە بەشی خوارووی لای راستی دیسكی خۆرەوە دێتە پێشەوە و لەوێوە خۆرگیرانی نیمچەیی دەست پێدەكات و كاتژمێر 08:38:47 ی بەیانی خۆرگیرانەكە دەگاتە بەرزترین ئاستی و لە پیش چاومان ئەو بەرە تاریك دادێت.
باس لەوەشكراوە، كاتژمێر 09:50:24 كۆتایی بەو دیاردەیە دێت لە هەرێمی كوردستان و دیاردەی خۆرگیران لە هەرێمی كوردستان لە دەستپێك تا كۆتایی 2 كاتژمێر و 15 خولەك و 32 چركە دەخایەنێت.
بەڕێوەبەرایەتی گشتی كەشناسی و بومەلەرزە زانی هەرێمی كوردستان هۆشداریی داوەتە هاووڵاتیان كەوا بەهیچ شێوەیەك هەوڵ نەدەن راستەوخۆ لە رێگەی (تلسكۆب و دووربین و كامێرا) لەهەر كات و ساتێك و لەژێر هەر بارێكدا سەیری خۆرنەكەن، چونكە دەستبەجێ زیانی راستەوخۆ بەچاو دەگەیەنێ و دەبێتە هۆی خوانەخواستە كوێربوونی كاتی یان هەمیشەیی یان دەبێتە هۆی حاڵەتی لەدەستدانی توانای بینینی رەنگەكان، بەڵكو پێویستە فلتەری تایبەت بە خۆر بەكار بهێنرێت و یان چاویلگەی خۆرگیران، كە بە داخەوە ئەم دوو بابەتە لە هەرێمی كوردستاندا دەستناكەون!.
ئەوەش راگەیەنراوە بەكارهێنانی مۆبایلی بەستراوە لەگەڵ دوربین یان تلیسكۆب دەبێتە هۆی سوتاندنی كامێرای مۆبایل یان پێگەیاندنی زیانێكی گەورە، ئەگەر هاتوو فلتەر بەكار نەهێنرێت.
