وەزارەتی خوێندنی باڵای حكومەتی هەرێمی كوردستان ماوەی سێ مانگ قەرەبوو دەدات بە خوێندكارانی خوێندنی باڵا و ئەوانەش كە بە پارالێڵ دەخوێنن، كرێكی خوێندنیان لێ وەرناگرێت.
لە نووسراوێكدا خوێندنی باڵا دوو بڕیاری لە بەرژەوەندیی خوێندكاران و قوتابیانی خوێندنی دبلۆمی باڵا و ماستەر و دكتۆرا لە زانكۆكانی هەرێم دەركردوە.
لەنوسراوەكەدا هاتووە، پێدانی ماوەی (3) مانگ لە رێكەوتی (10\3\2020) تاوەكو رێكەوتی (10\6\2020) وەكو قەرەبووكردنەوەی ماوەی خوێندن و مۆڵەتی خوێندن بۆ گشت قوتابیان و خوێندكارانی خوێندنی باڵا\دبلۆمی باڵا و ماستەر و دكتۆرا لە زانكۆكانی هەرێمی كوردستان، كە پێشووتر وەرگیراون و دەستیان بە خوێندنی ئەكادیمی كردووە و لە ئێستادا بەردەوامن لە خوێندن بە گشت قۆناغەكانی وەكو (كۆرسات و نوسینی توێژینەوە و تاوتوێكردن) و ئەو ماوەیە لە دەرەوەی ماوەی یاسایی ئەژمار دەكرێت.
هەر بەپێی بڕیارەكەی وەزارەتی خوێندنی باڵا لە حاڵەتێكدا ئەگەر خوێندكار بە شێوازی پارالێڵ وەرگیرابێت ئەوا ئەو ماوەیەی قەرەبووكردنەوەی كە لە سەرەوە ئاماژەی پێكراوە كرێی خوێندنی لێ وەرناگیرێت ئەمەش لەبەر ئەوەی لە دەسەڵاتی خۆی نەبووە.
