لیژنه‌ى دارایى په‌رله‌مانى عیراق ئاشكرایكرد، رێككه‌وتن كراوه 15 تریلیۆن دینار قه‌رزى ناوخۆیى و 5 ملیار دۆلاریش قه‌رزى ده‌ره‌كى بكرێت.
له‌وباره‌یه‌وه حه‌نین قه‌دۆ ئه‌ندامى لیژنه‌كه ئاشكرایكردوه، له كۆبونه‌وه‌ى لیژنه‌ى دارایى په‌رله‌مان و وه‌زیرى دارایى، كه تێیدا جێگرى یه‌كه‌مى سه‌رۆكى په‌رله‌مان ئاماده‌بو، گفتوگۆ له‌سه‌ر بارودۆخى ئابورى و دارایى و چاره‌سه‌ر و ده‌رچوون له‌م قه‌یرانه باسكراون.
رونیشیكردوه‌ته‌وه، لیژنه‌كه داواى له حكومه‌ت كردوه یاسای قه‌رزى ناوخۆیى و ده‌ره‌كى پێشكه‌ش بكات، ئه‌وه‌ش دواى پێشكه‌شكردنى په‌ڕاوى تایبه‌ت به چاكسازى ئابورى به په‌رله‌مان، چونكه وڵات پێویستى به رێوشوێنى خێرا و دانانى ستراتیژى داهاتوو هه‌یه بۆ هه‌مه‌جۆركردنى سه‌رچاوه‌ى دارایى و پشتگیریكردنى بودجه.
قه‌دۆ ته‌ئكیدیشى كردوه‌ته‌وه، له كۆبونه‌وه‌كه‌دا بڕیاردرا به بڕى 15 تریلیۆن دینار قه‌رزى ناوخۆیى و 5 ملیار دۆلار قه‌رزى ده‌ره‌كى بكرێت له بانكى نێوده‌وڵه‌تى و تایبه‌تیش ده‌بێت به ته‌واوكردنى پرۆژه‌كانى وه‌به‌رهێنان، قه‌رزو ناوخۆییه‌كانیش بۆ بودجه‌ى كارپێكردن ده‌بێت.
