پەرلەمانتارێكی لیژنەی دارایی لە پەرلەمانی كوردستان رایدەگەیەنێت، دەستبردن بۆ بژێوی مووچە خۆرانی كوردستان لای ئێمە هێڵی سوورە و دژی دەوەستین.
سەركۆ ئازاد گەڵاڵی ئەندامی لیژنەی دارایی لە پەرلەمانی كوردستان پەرلەمانتاری فراكسیۆنی یەكێتی لە پەیجی خۆی رایگەیاندووە، لە كۆبوونەوەی رۆژی سێ شەممەی لیژنەی دارایی بۆچونی فراكسێونی یەكێتی بە رون و راكشاوی بریتی بوو لەوەی كە بە هیچ شێوەیەك لە دەسەڵاتی حكومەت نییە موچەی موچە خۆران ببڕێیت چونكە ئەنجومەنی وەزیران لایەنی جێبەجێكارە و بڕیارەكانی دەسەڵاتی راگرتنی یاسای نیە، موچەی فەرمانبەر و خانەنیشتن بەیاسا رێكخراوە و پەرلەمانی كوردستان لایەنی پەیوەندارە و دەسەڵاتی هەمواری یاساكانی هەیە.
ئەوەشی وتووە: “پێشنیازم كرد كە داوا لە سەرۆكایەتی پەرلەمان بكرێت ئەو بڕیاڕە نا یاسایی و نا ئاساییە بە زووترین كات رابگیریت كە ناحەقییە بەرامبەر قووت و بژێویی خەڵك، جگە لەوەش لەبریارە نایاساییەكەدا هاتووە كە بڕینی مووچە رێكارێكی كاتییە و تەنیا بۆ موچەی ئەمجارەیە كە دابەش دەكرێت. ئێستا مانگی 6ی 2020و فەرمانبەرانی هەرێم هێشتا مووچەی مانگی 2ی 2020یان وەرنەگرتووە، ئەگەر مەبەست لە بڕیارەكەی حكومەت بۆ بڕینی مووچە تەنها مانگی شوبات بێت، ئەوا ڕوون دەبێتەوە كە بریارەكە خەلەلی یاسایی هەیە و دەگەرێتەوە بۆ دواوەو جێبەجێدەكرێت بەسەر مانگەكانی (شوبات تا تمووز) لەكاتێكدا یاسا وا كارناكات.
راشیگەیاندووە، لە برگەی (یەكەم/ ه)ی بریارەكەدا ئاماژە بەئاسەواری بڕیارەكە كراوە لەرابردوو داهاتووداو داوامكرد ئەم لایەنەش لەبەرچاو بگیرێت، پەرلەمانتارەكەی فراكسیۆنی یەكێتی لە لیژنەی دارایی دڵنیایی دەداتە هاووڵاتیان و مووچە خۆرانی حكومەتی هەرێمی كوردستان كە “دژی بڕینی مووچەن و دەستكاریكردنی بژێوی خەڵكی كوردستانن و كەمكردنەوەی خۆراكی سەر سفرەیان بە هەر پاساوێك بە هێڵی سور ناودەبات و دڵنیاییش دەدات لە بەردەوامییان بۆ رێگریكردن لەوكارە بەپێی رێككاری یاسایی و پەرلەمانی.
