سەرۆكی حكومەتی هەرێم رایدەگەیەنێت؛ چاكسازی وەك بابەتێكی سەرەكی كاری ئەم حكومەتە بوە و هەنگاوی باش نراوە، بەڵام كاتی دەوێت بۆ جێبەجێكردنی، دەشڵێت: خەڵكانێك هەن بەرژەوەندیان هەیە لەوەی ئاستەنگ بۆ چاكسازی دروست بكەن.
مەسرور بارزانی سەرۆكی حكومەتی هەرێمی كوردستان كە ماوەیەك بەر لە ئێستا داوای لە هاولاتیان كردبوو پرسیارەكانیانی ئاراستە بكەن، وەك خۆی باسی لێدەكات نزیكەی 45 هەزار پرسیاری لێكراوە و لە بەشی یەكەمی وەلامەكانیدا سەبارەت بە پرسی چاكسازی رایگەیاند، كە چاكسازی كارێكی ئاسان نییە، وێڕای ئەوەی داواكاری زۆربەی خەڵكی كوردستانە، بەڵام خەڵكێكیش هەن لەوانەیە بەرژەوەندیان هەبێت و دەكرێت رێگری بكەن و ئاسانكاری نەكەن و هاوكار نەبن بۆ چاكسازی، بۆیە پێویستی بە پشو درێژی هەیە و پێویستی بە ئیرادەیەكی بەهێز هەیە، هەروەها پێویستی بە هەندێك كاتیش هەیە بۆ ئەوەی بتوانین هەمو ئەو بەرنامەیەی لە كارنامەی حكومەت پێشكەش كراوە، جێبەجێ بكرێت.
سەرۆكی حكومەت راشیگەیاند: لەو ماوەیەدا زۆر شت كراوە، لەوانە نەهێشتنی گەندەڵی و نەهێشتنی دیاردەی بەرتیلدان، هەروەها زۆربەی ئەو خەرجیانەی پێویست نەبون، لابراون و هەوڵدراوە داهاتی ناوخۆ بە رێژەیەكی بەرچاو زیاد بكرێت و تەنیا بە رێكخستنەوە داهاتەكان، توانرا داهاتی ناوخۆ دو ئەوەندە زیاد بكرێت بەڵام بەهۆی قەیرانی كۆرۆنا و دابەزینی نرخی نەوت، وایكرد داهاتەكان كەمبێتەوە.
