ژماره‌یه‌ك له‌و ده‌رچووه یه‌كه‌مانه‌ی زانكۆ و په‌یمانگاكان، كه دانه‌مه‌زراون، له سلێمانی گردبوونه‌وه و چونه به‌رده‌م نوسینگه‌ی په‌رله‌مانی كوردستان و داوای دامه‌زراندنیان كرد.
ئه‌مڕۆ ژماره‌یه‌ك له ده‌رچوانی یه‌كه‌م و دووه‌م و سێیه‌می ساڵی خوێندنی 2016-2017ی زانكۆ و په‌یمانگاكانی هه‌رێمی كوردستان، له‌به‌رده‌م نوسینگه‌ی په‌رله‌مانی كوردستان، له سلێمانی گردبوونه‌وه.
یه‌كه‌مه دانه‌مه‌زراوه‌كان یاداشتێكیان خوێنده‌وه و ئاماژه‌یان به‌وه‌دا، ژماره‌یان هه‌زار و 100 ده‌رچو ده‌بێت و ماوه‌ی چه‌ند ساڵێكه خوێندنیان ته‌واوكردوه، هێشتا دانه‌مه‌زراون و له‌ئێستادا بێكارن و باری گوزه‌رانیان زۆرخراپه، ته‌نانه‌ت توشی جۆرێك له نه‌خۆشیی ده‌رونی بوون، بۆیه داوای دامه‌زراندنیان كرد.
یه‌كه‌مه دانه‌مه‌زراوه‌كان ئاماژه‌یان بۆ ئه‌وه‌شكرد، حكومه‌تی هه‌رێمی كوردستان له ئاستی ده‌رچواندا كه‌مته‌رخه‌مه و پێویسته ئاوڕی جدییان لێبداته‌وه و دایانمه‌زرێنێت.
هه‌ر ئه‌مڕۆ له قه‌زای رانیه به‌هه‌مانشێوه ژماره‌یه‌ك له ده‌رچوانی زانكۆ و په‌یمانگاكان، بۆ هه‌مان مه‌به‌ست له‌به‌رده‌م زانكۆی راپه‌ڕین گردبونه‌وه.
