زانایەكی فەرەنسی پێشبینی دەكات ئەستەمبێت تا ساڵی 2021 ڤاكسینێكی كاریگەر دژی ڤارۆسی كۆرۆنا دروستبكرێت، داواش لە هاووڵاتیان دەكات بەشێوەیەكی باشتر پابەندبن بە دوركەوتنەوەی كۆمەڵایەتییەوە.
ئارنۆ فۆنتانیە شارەزای زانستی پەتاكان و ئەندامی ئەنجومەنی زانستی فەرەنسی تایبەت بە ڤایرۆسی كۆرۆنا بە كەناڵی “BFMTV” وتوە “دروستكردنی ڤاكسینێكی كاریگەر چەندین ساڵی دەوێت، بەدڵنیاییەوە هەوڵێكی زۆر هەن بۆ گەشەپێدانی ڤاكسینێك بۆ كۆرۆنا، بەڵام ئەگەر تا ساڵی 2021 ڤاكسینێكی چالاك دروستكرا ئەوا توشی سەرسوڕمانم دەكات”.
باسی لەوەشكردوە، هەرچەندە لەوانەیە ڤاكسینێك دروستبكرێت، كە بەشێوەیەكی رێژەیی سودی هەبێت، بەڵام كۆتاییهاتنی قەیرانەكە تائێستا دورە، بۆیە پێویستە خەڵك لەگەڵ ڤایرۆسەكەدا بژین، لەبەرئەوەی بەدوری دەزانین دەسەڵاتداران دوبارە رێوشوێنی داخستن پەیڕەوبكەن، هەربۆیە دەبێت هاووڵاتیان بە جدیتر پابەندی رێوشوێنی دوركەوتنەوەی كۆمەڵایەتی بن.
ئەو زانا فەرەنسیە دەشڵێت “لانیكەم با پابەندی دوركەوتنەوەی جەستەیی بین ئەم هاوینە، چونكە كۆبونەوەی گەورە و فراوان گەورەترین سەرچاوەی مەترسییە”.
