نوسینگەی پارێزگاری هەولێر رونكردنەوە لەسەر لێدوانێكی فرسەت سۆفی دەدات، لەبارەی وەرگرتنی پارە لەبەرامبەر پشكنینی ئەو هاووڵاتیانەی دەچنە پارێزگای هەولێرەوە، دەڵێت “لێكدانەوەی هەڵەی بەمەست و بێمەبەست بۆ قسەكانی كراوە”.
دەقی رونكردنەوەی نووسینگەی پارێزگاری هەولێر
لەلایەن هەندێك كەس و میدیا، لێكدانەوەی هەڵەی بەمەست و بێمەبەست بۆ قسەكانی پارێزگاری هەولێر كراوە كە ئەمڕۆ لە كۆنگرەیەكی ڕۆژنامەوانی لەسەر هاتنە ژوورەوەی خەڵكی پارێزگاكانی دیكەی عێراق بۆ پارێزگای هەولێر كردنی.
پارێزگاری هەولێر زۆر بەڕوونی ڕایگەیاند: “لەپێناو كارئاسانی هاتنە ژوورەوەی هاوڵاتییانی شارەكانی دیكەی عێراق جگە لە پارێزگاكانی هەرێمی كوردستان، ژووری ئۆپەراسیۆنی پارێزگای هەولێر بەهەماهەنگی لەگەڵ بەڕێوەبەرایەتی گشتی تەندروستی هەولێر، سەرقاڵی داڕشتنی میكانزمێكن بۆ ئەوەی ئەو خەڵكانە بتوانن بێنە ناو شاری هەولێر بەمەرجی ئەنجامدانی پشكنینی پزیشكی لەسەر ئەركی خۆیان و بە نرخێكی گونجاو، ئەمەش هەم بۆ كارئاسانی هاوڵاتییان و هەمیش بۆ پەرەپێدانی جموجۆڵی بازرگانی و ڕانەوەستانی كاروكاسبی خەڵك”، بۆیە هەرچی دیكەی دەگوترێ، بێجگە لەوەی كە باسكراوە دوورە لەڕاستی و مەبەست لێی تەنها بڵاوكردنەوەی چەواشەكاری و بەلاڕێدابردنی ڕاستییەكانە.
