وتەبێژی فەرمی حكومەتی هەرێمی كوردستان وردەكاری كۆبوونەوەی ئەمڕۆی ئەنجوومەنی وەزیرانی ئاشكراكرد و ڕایگەیاند، كە دوو پەیڕەو بۆ دامەزراندنی پلەتایبەتەكان و دروست كردنی سندوقی خانەنشینی فەرمانبەران دەركرد.
جوتیار عادل، وتەبێژی فەرمی حكومەتی هەرێم لە كۆنگرەیەكی ڕۆژنامەوانیدا ڕایگەیاند، كە لە چوارچێوەی چاكسازیدا ئەمڕۆ ئەنجوومەنی وەزیران پەیڕەوی سندوقی خانەنشینانی فەرمانبەرانی پەسەند كرد، كە تێیدا شایستە داراییەكانی فەرمانبەرانی تێدا كۆدەكرێتەوە و چونكە فەرمانبەر چەندین ساڵ خزمەت دەكات و لەوێوە شایستەكانی خەرج دەكرێت دوای خانەنشین بوونی.
ئاشكراشی كرد، كە پەیڕەوی دامەزراندنی پلە تایبەتەكان پەسەند كرا، كە لەمەودوا دەبێت سەرەڕای مەرجە گشتیەكانی ناو یاسای خزمەتی شارستانی، دەبێت چەند مەرجێكی دیكەش هەبێت بۆ ئەوەی كەسێك لە پلەیەكی تایبەت دابمەزرێت.
باسی له‌وه‌شكرد كرد، كە گفتوگۆ لەسەر تاپۆكردنی زەویە بێ تاپۆكان كراوە لەگەڵ چەند بابەتێكی كشتوكاڵی.
دەربارەی دابەشكردنی مووچە وتی، “ئەركی سەرەكی حكومەت دابین كردنی مووچەیە و بەپێی ئەو داهاتەی لەبەردەستە مووچە دابەش دەكرێت، بەڵام بەهۆی لێكەوتە داراییەكانی كۆرۆنا و دابەزینی نرخی نەوت داهات كەمی كردووە و هەروەها بەردەوامیشین لە گفتوگۆ لەگەڵ عیراق بۆ گەیشتن بە ڕێكەوتن، بۆیە وەكو حكومەت پابەندی شایستە داراییەكانی فەرمانبەرانین”.
سەبارەت بە هۆكاری دواكەوتنی چوونی شاندی هەرێم بۆ بەغدا وتی، “لە ئایندەیەكی نزیكدا سەردانەكان دەستپێدەكاتەوە و هیچ كێشەیەك نییە و لە هەردوولاوە نیەتی ڕێككەوتن هەیە، بەڵام هەندێك وردەكاری هونەری ماوەن”.
