دو پەرلەمانتاری كورد لە پەرلەمانی عێراق داوا لە مستەفا كازمی، سەرۆك وەزیرانی عێراق دەكەن پڕۆسەی كۆنترۆڵكردنی دەروازە سنورییەكان، دەروازەكانی هەرێمی كوردستانیش بگرێتەوە.
هەردو پەرلەمانتاری كورد غالب محەمەد و سەركەوت شەمسەدین، لە نوسراوێكی هاوبەشدا كە ئاڕاستەی مستەفا كازمی سەرۆك وەزیرانی عێراقیان كردوە، رایانگەیاندووە: ئێمە پشتیوانی تەواوی هەوڵەكانتان دەكەین بۆ كۆنترۆڵكردنی دەروزە سنورییەكان لە عێراق و هیوادارین ئەم هەنگاوانە هەرێمی كوردستانیش بگرێتەوە، بەشێوەیەك كە بەتەنسیق بێت لەگەڵ حكومەتی هەرێم و بەتایبەتی حكومەتە خۆجێییەكانی پارێزگاكان بەمەرجی ئەوەی سەرپەرشتی و چاودێری داهاتی ئەو دەروازە سنورییانە لەلایەن دیوانی چاودێری دارایی عێراقەوە بێت وەك ئەوەی لە پارێزگاكانی دیكەی عێراق هەیەو لەسەدا 50ی داهاتی دەروازەكان بۆ پارێزگاكە خەرج بكرێت.
ئاماژەیان بەوەشداوە كە لە كوردستانیش هاشێوەی ناوچەكانی تری عێراق، جگەلە كۆنترۆڵی كۆمپانیا حزبیەكان بەسەر دەروازە فەرمیەكاندا، بە دەیان دەروازەی نافەرمی هەیە كە بەتەواوی چەكدار و كۆمپانیای حزبی دەستیان بەسەردا گیراوە و ئەوەش بۆتە مەترسییەكی گەورە لەسەر بازار و دۆخی ئابوری و تەندروستی هەرێمی كوردستان.
ئەو دو پەرلەمانتارە باسیان لەوەش كردوە كە لە سنوری پارێزگای دهۆك لەگەڵ سوریا، كۆمپانیایەكی حزبی ئیدارەی خاڵێكی سنوری دەدات بەناوی (وەلید)، هەروەها لە سنوری پارێزگای سلێمانی و هەڵەبجە چەندین خاڵی سنوری ناڕەسمی هەن كە كۆمپانیا حزبییەكان هەیمەنەیان هەیە بەسەریانەوە و رۆژانە سەرانە لە بازرگان و هاوڵاتیان وەردەگرن، ئەمە سەرەڕای هێنانی كەلوپەلی قاچاغ بۆ ناو بازارەكانی عێراق بەدور لەهەمو پێوەرە تەندروستی و بازرگانییەكان.
