رۆژی سێشەممە 21ی تەمووز لیژنەی باڵای رووبەڕووبوونەوەی کۆرۆنا لە هەرێمی کوردستان بە ئامادەبوونی وەزیری ناوخۆ و تەندروستی و پارێزگارەکان کۆدەبێتەوە و بڕیاری نوێ دەدات دەربارەی رێکارە نوێکانی خۆپارێزی لە بڵاوبوونەوەی ڤایرۆسی کۆرۆنا و هەڵگرتن یان بەردەوامبوونی قەدەغەکردنی هاتوچۆ لەنێوان پارێزگاکان.
لەمبارەوە سەرۆکی ئەنجوومەنی پارێزگای هەولێر، عەلی رەشید رایگەیاند “سەرجەم ئەندامانی ژووری ئۆپەراسیۆنەکانی پارێزگای هەولێر بەخودی پارێزگاریشەوە لەگەڵ کۆتایی هێنانین بە قەدەغەی هاتوچۆی نێوان پارێزگاکان و داوامان کردووە هاتوچۆی نێوان هەولێر و پارێزگاکانی دیکە ئاسایی بکرێتەوە”.
عەلی رەشید لە لێدوانێکدا وتی: “دەمێکە ئەمە داوای ئێمەیە وەک ئەنجوومەنی پارێزگای هەولێر و لە چەندین کۆبوونەوەی پێشتری ژووری ئۆپەراسیۆنەکانیش ئەو داوایەمان کردووە کە ژیان ئاسایی بکرێتەوە چونکە ئەو نەخۆشییە ئیدی لە هەموو کوچە و کۆڵانەکان هەیە و دەبێت ئێمە بە تاکپارێزی بەرەنگاری ببینەوە و دەبێت ژیان ئاسایی بکەینەوە، چونکە کاروکاسبی و گوزەرانی خەڵک نەماوە”.
سەرۆکی ئەنجوومەنی پارێزگای هەولێر راشیگەیاند “رۆژی سێشەممە پارێزگاری هەولێر بە نوێنەرایەتی ژووری ئۆپەراسیۆنەکانی پارێزگاکە ئەم داوایە لە کۆبوونەوەکەدا دەخاتەڕوو کە هەموو هەرێمی کوردستان وەک یەک بازنە سەیربکرێت و هاتوچۆی نێوان پارێزگاکان ئاسایی بکرێتەوە، لەگەڵ حکوومەتی عێراقیش هەندێک رێنمایی دابنرێت بۆ ئەوەی هاووڵاتییان لە شارەکانی عێراقیشەوە بێن، بەڵام رێنماییەکان بەجۆرێکی دیکە بێت و هەندێک مەرجی تێدابێت بۆ نموونە پشکنینیان بۆ بکرێت”.
عەلی رەشید وتیشی: “تاوەکو ڤایرۆسەکە لە دەرەوە بۆمان دەهات گرنگیمان بە قەدەغەی هاتوچۆی نێوان شارەکان دەدا، بەڵام ئێستا کە هاتووەتە ناو شار و شارۆچکە و کۆڵان و گەڕەکەکان ئیدی قەدەغەی هاتوچۆ رۆڵی نامێنێت دەبێت ژیان ئاسایی بکرێتەوە و هاتوچۆ ئاسایی بکرێتەوە”.
ئێوارەی دوێنێ ژووری ئۆپەراسیۆنەکانی پارێزگای هەولێر بڕیاری دا بە هەمان رێکارەکانی هەفتەی رابردوو مامەڵە لەگەڵ دۆخەکە بکرێت لە پارێزگای هەولێر و رێکارەکانیان درێژکردەوە تاوەکو رۆژی سێشەممە ٢١ی تەمووز، دوای کۆبوونەوەی لیژنەی باڵای رووبەرووبوونەوەی کۆرۆنا لە هەرێمی کوردستان هەر بڕیارێک بدرێت لە هەولێریش کار بەو بڕیار و رێکارە نوێیانە دەکرێت.
