سەعد خەزعەلی ئەندامی لیژنەی ئابوری و وەبەرهێنان لە پەرلەمانی عیراق داوا لە مستەفا كازمی سەرۆك وەزیران دەكات هێزی سەربازی رەوانەی دەروازە سنورییەكانی هەرێمی كوردستان بكات.
ئەو پەرلەمانتارەی عیراق لە لێدوانێكی رۆژنامەوانیدا باسی لەوەكردوە، زۆرینەی داهاتی نانەوتیی عیراق بریتییە لە دەروازە سنورییە وشكانیەكان بەوانەی هەرێمی كوردستانیشەوە، بەڵام ئەو داهاتە دەچێتە دەستی حزبە دەسەڵاتدارە سیاسییەكانەوە.
رونیشیكردوەتەوە، عیراق خاوەنی 12 دەروازەی سنورییە لەگەڵ وڵاتانی دراوسێ، كە دەتوانێت لە رێگەیانەوە ساڵانە 6 ملیار دۆلار بەدەستبهێنێت.
هەروەها ئەو پەرلەمانتارە دەڵێت “راپۆرتەكان تەئكید لەوەدەكەنەوە خاڵە سنورییەكانی هەرێمی كوردستان لەژێر دەستی حكومەتی فیدراڵیدا نین، بۆیە پێویستە مستەفا كازمی سەرۆك وەزیران هێزی سەربازی بنێرێت و هەیبەتی دەوڵەت لەو دەروازانە بسەپێنێت”.
