سیاسەتوانێكی هەرێمی كوردستان مەترسیی لە هەوڵەكانی مستەفا كازمی هەیە بۆ كۆنترۆڵكردنی دەروازە سنورییەكانی هەرێم، دەڵێت، لێسەندنەوەی ئەو دەروازانە، لێسەندنەوە نییە لە پارتی و یەكێتی، بەڵكو لێسەندنەوەیە لە سەروەریی هەرێمی كوردستان.
سالار مەحمود سیاسەتوانی هەرێمی كوردستان، لەمیانی بەشداریكردنی لە گفتوگۆی “نیو كاژێر”ی رادیۆ نەوا، قسەی لەسەر ئەو هەنگاوانە كرد، كە مستەفا كازمی سەرۆك وەزیرانی عیراق دەستیپێكردوون، بەتایبەت كۆنترۆڵكردنی دەروازە سنورییەكان، لەبارەی ئەگەری كۆنترۆڵكردنی دەروازە سنورییەكانی هەرێمی كوردستان، رایگەیاند، لێسەندنەوەی مەرزەكان، لێسەندنەوە نییە لە پارتی و یەكێتی، بەڵكو لێسەندنەوەیە لە سەروەریی هەرێمی كوردستان.
وتیشی، ئەو هەنگاوانە، هەوڵن بۆ كۆنترۆڵكردنی سەرچاوەكانی داهاتی هەرێم، كە سالار مەحمود بەتایبەت ترسی لەوە هەبوو، سەرچاوەكانی داهاتی ناوچە دابڕێنراوەكان و نزیك لەو ناوچانە زیاتر بكەونە بەر مەترسی، بەتایبەت مەرزی پەروێزخان.
لەوەڵامی ئەو پرسیارەی، كە ئایا هیچ هێز و كەسایەتییەكی سیاسیی هەرێمی كوردستان پشتگیریی لەو هەنگاوانەی كازمی بەرامبەر بە هەرێم دەكەن؟ سالار مەحمود بە بەڵێ و نەخێر وەڵامی نەدایەوە، بەڵام وتی، مافی خۆتە ویستی سیاسیت هەبێت، بەڵام نابێت لەسەر بنەمای پرسە نیشتمانییەكان بێت.
سالار مەحمود نەیشاردەوە، كە هەوڵێك هەیە بۆ ئەوەی عیراق دووبارە مەركەزیەت پەیڕەوبكاتەوە، بەڵام بەباشی زانی، لەبری پشتگیریكردن لەو مەركەزییەتە و بەهێزبونی عیراق، هەرێمی كوردستان چاكسازی بكات و بە شەفافبوون خۆی بەهێز بكات.
