هادی عامری سەرۆكی هاوپەیمانیی فەتح داوا لە حكومەتی عێراق دەكات بێدەنگی بەرامبەر لەشكركێشی توركیا بشكێنێت، مەترسیی ئەوەی هەیە توركیا هەوڵی سەپاندنی سیاسەتی ئەمری واقیع بدات و پشتێنەیەكی ئەمنی هاوشێوەی پشتێنەی ئەمنی لە باكوری سووریا دروستبكات.
هادی عامری سەرۆكی هاوپەیمانیی فەتح لە راگەیەندراوێكدا سەبارەت بە هێرشەكانی توركیا لە سنوری عێراق دەڵێت “بەو پەڕی نیگەرانییەوە چاودێری لەشكركێشیی فراوانی توركیا لە باكوری عێراق دەكەین، لەژێر هەر پاساوێك بێت رەتكراوەیە، هیچ پاساوێكی نێودەوڵەتی، یاسایی و شەرعی بۆ ئەو لەشكركێشییە نییە، لە رووی قوڵایی و ماوەوە لەشكركێشی ئەمجارە جیاوازە لەگەڵ لەشكركێشییەكانی پێشوو”.
عامری ئەو لەشكركێشییەی توركیا بە مەترسی دەزانێت و ئاماژە بەوە دەدات، كە “پێدەچێت توركەكان هەوڵی سەپاندنی سیاسەتی ئەمری واقیع بدەن و پشتێنەیەكی ئەمنی هاوشێوەی پشتێنەی ئەمنی لە باكوری سوریا دروستبكەن”.
سەرۆكی هاوپەیمانی فەتح دەشڵێت “پێمانوایە ئەو كردەوە دوژمنكارانەیە لە بەرژەوەندیی توركیا و عێراق نییە، كە پەیوەندی مێژوویی، ئایینی و برایەتیی فراوان پێكەوە دەیانبەستێتەوە، سەرەڕای پەیوەندیی فراوانی ئابووری”.
عامری داواش لە حكومەتی عیراق دەكات ئەو بێدەنگییەی بشكنێنێت و ئەو پرسە لە كۆمكاری عەرەبی و رێكخراوی كۆنگرەی ئیسلامی و كۆمەڵگەكانی نێودەوڵەتی بوروژێنێت.
