ئەمڕۆ بە سەرپەرشتی و ئامادەبوونی مەسرور بارزانی سەرۆكی حكومەتی هەرێمی كوردستان، ڕێورەسمی دانانی بەردی بناغەی دەڤەری پیشەسازیی خۆراك لە شاری دهۆك بەڕێوەچو.
لە رێوڕەسمەكەدا مەسرور بارزانی وتارێكی پێشكەشكرد و تێیدا جەختیكردەوە، بڕیاری گرنگ دراون بۆ هەندێك بەرنامەی هاوبەش لەنێوان حكومەت و كەرتی تایبەت تاوەكو، چاو و رزقی خەڵك لە دەستی خۆیدا بێت و چاوی لە دامەزراندنی حكومەت نەبێت.
وتیشی “وەكو دەزانن سەرەتای دەستپێكی كابینەی نوێ بەڵێنماندا گرنگی بە كەرتی دیكەی ئابووری بدەین و پشت بە یەك سەرچاوە نەبەستین، بۆیە پەرەپێدان بە كەرتی پیشەسازی و كشتوكاڵ و بازرگانی، یەكێك بوو لەو بەڵێنانەی لە كارنامەی حكومەتدا بو، ئەمڕۆش خۆشحاڵم لێرەین بۆ دانانی بەردی بناغەی ئەو ناوچە پیشەسازییە لە پارێزگای دهۆك”.
مەسرور بارزانی وتیشی “بەرهەم و خێری ئەو ناوچەیە بۆ هەموو كوردستانە”.
هەر لە رێوڕەسمەكەدا، كەمال موسلیم وەزیری بازرگانی و پیشەسازیی هەرێمی كوردستان باسی لەوەكرد، پرۆژەكە لە كانی سپی لە قەزای سێمێل لە پارێزگای دهۆك لەسەر روبەری 969 دۆنم دروستدەكرێت و گەورەترینە لەسەرئاستی عیراق و هەرێمی كوردستان، كەرتی كشتوكاڵ و ئاژەڵداریش دەبوژێنێتەوە.
وتیشی “پلانمان هەیە 11 ناوچەی پیشەسازیی لە ناوچەكانی هەرێمی كوردستاندا دروستبكەین”.
