پەرلەمانتارێكی یەكێتی رەتیدەكاتەوە كارەكانیان لە پەرلەمانی كوردستان هەڵپەساردبێت، “بێمنەتیی پارتیش” بەوەی بێ یەكێتی درێژە بە كۆبونەوەكانی پەرلەمان بدات، بە خراپ وەسف دەكات.
عەباس فەتاح ئەندامی فراكسیۆنی یەكێتیی نیشتمانیی كوردستان لە پەرلەمانی كوردستان، لەمیانی بەشداریكردنی لە گفتوگۆی “نیو كاژێر”ی رادیۆ نەوا، رایگەیاند، رەخنەكانی یەكێتی لە ئاراستەی كاری پەرلەمان پەیوەندیی بەوەوە هەیە، كە زۆر پرسی تایبەت بە لایەنی دارایی و ئابوری و بژێویی خەڵك و قەرزەكانی حكومەت و پرسی هێرشە سەربازییەكان هەن، بەڵام پەرلەمان سەرەڕای ئەوەی مانگێك ماوەی كاركردنی درێژكردەوە و چەند رۆژێك ماوە بۆ تەواوبوونی ئەو ماوەیە، تا ئێستا قسەی لەسەر ئەو پرسانە نەكردووە.
بەڵام پەرلەمانتارەكەی یەكێتی رەتیكردەوە، فراكسیۆنەكەیان كارەكانی لە پەرلەمانی كوردستان هەڵپەساردبێت و وتی، پەرلەمانتارەكانیان لە كارەكانیان لە لیژنە جیاوازەكان بەردەوامن.
لەبارەی قەسەكەی سەرۆكی فراكسیۆنی پارتیش، كە رایگەیاندبوو، ئەوان بێ یەكێتیش درێژە بە كۆبونەوەكانی پەرلەمان دەدەن، پەرلەمانتارەكەی یەكێتی رایگەیاند، ئەو بێمنەتییە خراپە و بۆ پارتی و بۆ یەكێتیش باش نییە.
لەبارەی ئەگەری كشانەوە لە حكومەتی هەرێمی كوردستانیش، عەباس فەتاح هیوایخواست، كە دۆخەكە نەگاتە ئەو كاتەی نە یەكێتی لە حكومەت بكشێتەوە و نە پارتیش هەنگاوێكی نەگونجاو بنێت، وتی، دەبێت یەكێتی بزانێت كام بڕیار لەبەرژەوەندیی خەڵكی كوردستان دەدات.
عەباس فەتاح رەخنەی ئەوەشی هەبوو، كە حزبەكان ناتوانن كۆببنەوە، وتی، پێم سەیرە لەسەر پۆستی وەزیرێك كۆدەبنەوە، بەڵام لەسەر ئەو پرسە گرنگانە كۆنابنەوە و كێشەكان چارەسەر ناكەن.
