بەڕێوەبەری گشتیی وەزارەتی بازرگانی حكوومەتی ھەرێم رایدهگهیهنێت، ئاڵوگۆڕی بازرگانیی نێوان ھەرێم و ھەردوو وڵاتی توركیا و ئێران بەردەوام لە زیادبووندایە و لە ئێستادا ساڵانە ئاڵوگۆڕی بازرگانی لەگەڵ ئەو دوو وڵاتەدا دەگاتە 16ملیار دۆلار.
نەوزاد ئەدھەم بەڕێوەبەری گشتیی وەزارەتی بازرگانی حكوومەتی ھەرێم له لێدوانێكدا بۆ ماڵپەڕی فەرمیی پارتی رایگەیاندوه، “دۆخی بازرگانی لە ھەرێمی كوردستان زۆر باش بووە و لە ئێستادا تەنھا جموجۆڵی بازرگانی لە نێوان عێراق و ئێران 12ملیار دۆلارە، كە تەنھا لەگەڵ ھەرێمی كوردستان چوار ملیار دۆلارە ساڵانە و، پلانیش دانراوە بگاتە 20ملیار دۆلار”.
وتیشی: “رۆژ بەڕۆژ ھەوڵ دەدرێت بۆ ئەوەی ئاستی بازرگانیی نێوان هەرێم و ئەو دوو وڵاتە زیاتر بێت، تا ئەوەی مەبەستمانە، بگاتە ئەو ئاستە”.
ناوبراو لەبارەی ئاڵوگۆڕی بازرگانی لەگەڵ توركیا، ئهوهی خستهڕوو “لە ئێستادا ئاڵوگۆڕی بازرگانیی نێوان ھەرێمی كوردستان و توركیا گەیشتووەتە ئاستی پێش كۆرۆنا و ھەموو كەلوپەلێك ھاوردە دەكرێت، كە ساڵانە ئەویش نزیكەی 12ملیار دۆلارە”.
