جۆ بایدن كاندیدی دیموكراته‌كان بۆ هه‌ڵبژاردنی سه‌رۆكایه‌تی ئه‌مریكا جه‌ختده‌كاته‌وه، دۆناڵد ترامپ یه‌كه‌م سه‌رۆكی ره‌گه‌زپه‌رسته له مێژووی ویلایه‌ته یه‌كگرتوه‌كاندا.
جۆ بایدن له چوارچێوه‌ی هه‌ڵمه‌تی بانگه‌شه‌ی هه‌ڵبژاردنی سه‌رۆكایه‌تیدا، كه بڕیاره مانگی 11ی ئه‌مساڵ به‌ڕێوه‌بچێت، هێرشێكی توندی كرده‌سه‌ر ترامپ و به “یه‌كه‌م سه‌رۆكی ره‌گه‌زپه‌رست له مێژووی ویلایه‌ته یه‌كگرتوه‌كان”دا وه‌سفیكرد و وتی “كارێكی زۆر قێزه‌ونه كاتێك ترامپ له‌سه‌ر بنه‌مای ره‌نگی روخسار و ئه‌سڵ و شوێنی له‌دایكبون مامه‌ڵه له‌گه‌ڵ خه‌ڵكدا ده‌كات”.
وتیشی “هیچ سه‌رۆكێك نه‌بوه له ئه‌مریكادا به‌و شێوه‌یه هه‌ڵسوكه‌وت بكات، ته‌نانه‌ت هیچ سه‌رۆكێكی كۆمارییه‌كان به‌و جۆره نه‌بوه، به هه‌مان شێوه دیموكراته‌كانیش وا نه‌بون، به‌ڵام ئێستا كه‌سانی ره‌گه‌زپه‌رستمان هه‌یه و هه‌وڵیاندا سه‌رۆكێكی هه‌ڵبژێردراویان هه‌بێت، ئه‌وه‌تا سه‌رۆكه‌كه‌یان هه‌یه”.
