سەعدی پیرە، ئەندامی مەكتەبی سیاسی یەكێتی رایدەگەیەنێت”هەندێك لە هەڵوێستەكانی پارتی نائیجابی بون بەرامبەر بە كۆنگرەی چوارەمی یەكێتی” دەشڵێت،”كۆبونەوەی بافڵ تاڵەبانی لەگەڵ مەسعود بارزانی زەرور بو بۆ دەستپێكی كردنەوەی هەندێك گرێ كوێرە كە رێگربون لە بەردەم چارەسەركردنی كێشەكان”.
سەعدی ئەحمەد پیرە لە لێدوانێكدا بۆ ئاژانسی ئانادۆل باسی لەوەكردووە،”جۆرێك لە گرژی هەبوە لەنێوان پارتی و یەكێتی، ئەمەش بوەتەهۆی ئەوەی كە كۆبونەوە پێویستەكان دوابخرێت، هەندێك لە هەڵوێستەكانی پارتی نائیجابی بون بەرامبەر بە كۆنگرەی چوارەمی یەكێتی، ئەمانە هەموی پێویستی بە بەدواداچونە، كۆبونەوەی هاوسەرۆكی یەكێتی نیشتمانی كوردستان، بافڵ تاڵەبانی لەگەڵ مەسعود بارزانی زەرور بو بۆ دەستپێكی كردنەوەی هەندێك گرێ كوێرە كە رێگربون لە بەردەم چارەسەركردنی كێشەكان و پێشبینی دەكەین لە ماوەیەكی كورتدا كۆبونەوە ئەنجامبدرێت، بەڵام هیچ كاتێك دیاریی نەكراوە”.
ئاماژەی بەوەشكرد،”خیلافاتێكی زۆر هەیە لەنێوان پارتی و یەكێتی، هەمومان لەم دۆخە نیگەرانین، بەڵام هەندێك لە ئێمە پێیوایە چارەسەركردنی كێشەی دارایی بەجۆرێك دەكرێت، هەندێكی دیكە پێیوایە بە جۆرێكی دیكە دەكرێت، ئێمە پێمانوایە، نەمانتوانیوە مۆفەق بین لە فرۆشتنی نەوت و رادەستی عێراقی بكەین، بەڵام لەبەرامبەردا، عێراق گرەنتی ئەوە بدات كە میزانییەی تەواو بنێرێت و ئەمە كێشەی رۆژانەی خەڵكە، جاری وا هەیە ئەم ناكۆكییانە پەل دەهاوێژێت بۆ ناو حكومەت و پەرلەمان و زۆرجار هەبوە گفتوگۆی جددی هەبوە و ئەكید ئەمە لەنێوان سەرۆكی پەرلەمان و جێگرەكەی هەیە”.
