موراد قەرەیلان ئەندامی كۆمیتەی بەڕێوەبەری پەكەكە لە بارەی شەڕی حەفتانینەوە ڕایگەیاند، ئێستا گەریلاكانیان بە شێوازێكی نوێ شەڕ دەكەن و لە ماوەی یەك مانگدا لە حەفتانین 236 سەربازی سوپای توركیا كوژراون.
موراد قەرەیلان بە میدیاكانی پەكەكەی ڕاگەیاندوە، لە 17ی حوزەیرانەوە تا 17ی تەموز، لە دژی هێرشەكانی سوپای توركیا، هێزەكانی گەریلا لە حەفتانین 95 جار چالاكییان ئەنجامداوە و لە چالاكییەكاندا 236 سەربازی توركیا كوژراون و گورزیش لە شەش هەلیكۆپتەری جۆری كۆبرا دراوە.
قەرەیڵان راشیگەیاند، ئەو ئەنجامەی لە حەفتانین دەركەوتووە ئەوەیە، كە ئەگەر شەڕڤانێك بە ئیرادە و ئازایەتی و لێهاتویی بە شێوەیەكی پرۆفیشناڵ بجوڵێتەوە ئەو كاتە دەتوانێت تەكنەلۆژیای سەردەم تێكبشكێنێت و لە دژی شەڕ بكات، ئەو شەڕەش ئەوەی بۆ روون كردنەوە كە گەریلای حەفتانین گەریلای سەردەمی نوێیە.
ئاماژەی بەوەشكرد، كە پەكەكە دەیەوێت لە ناو سنوری توركیا ماف و ناسنامەی كورد قبوڵ بكرێت، چونكە كورد دەبێت بە كەلتور و زمانی خۆی بژی و خۆی خۆی بەڕێوە ببات و پێویستە هەموو كەس ئەوە بزانێت؛ كە پەكەكە ئێستا باشترین چارەسەری لەناو سنووری توركیا دەوێت.
