زانایانی ئیسرائیلی ئاشكرایان كرد، له رێگه‌ی دروستكردنی په‌نكریاسێكی ده‌ستكرده‌وه ده‌توانن بۆ هه‌میشه تووشبوانی نه‌خۆشی شه‌كره له ده‌رزی ئانسۆلین رزگاربكه‌ن.
كۆمپانیای بیتالین تراپوتیكسی ئیسرائیلی رایگه‌یاند، ئه‌و په‌نكریاسه بایۆلۆجیه بۆ نه‌خۆشانی شه‌كره‌ی جۆری یه‌ك و دوو به‌كارده‌هێنرێت و ئاستی شه‌كری خوێن راده‌گرێت، به بێ ئه‌وه‌ی پێویستیان به ده‌رزی ئانسۆلین بێت.
په‌نكریاسه ده‌ستكرده له شێوه‌ی ئه‌سكه‌له‌یه‌كه زۆر بچوكی بایۆلۆجیه له خانه‌كانی ریخۆڵه‌ی به‌راز دروستكراوه و خانه‌كانی په‌نكریاسی له‌سه‌ر داده‌نرێت و به پێی رێژه‌ی شه‌كری خوێنی نه‌خۆشه‌كه ماده‌ی ئانسۆلین ده‌رده‌دات.
په‌نكریاسه ده‌ستكرده‌كه، كه زۆر به دژواری به چاو ده‌بینرێت، له نه‌شته‌رگه‌ریه‌كی ئاساندا له ژێر پێستی رانه‌وه داده‌نرێت.
به‌رپرسانی كۆمپانیاكه به رۆژنامه‌ی گاردیانیان وتووه، له به‌ریتانیا تاقیكردنه‌وه‌ی مرۆیی له‌سه‌ر ئه‌و داهێنانه‌یان ده‌كه‌ن و بڕیاره له‌سه‌ر هه‌زاران كه‌س له چه‌ند نه‌خۆشخانه‌یه‌كی ئه‌و وڵاته ئه‌و په‌نكریاسه‌یان له‌سه‌ر تاقیبكرێته‌وه.
سه‌باره‌ت به نرخه‌كه‌شی رایانگه‌یاندووه، نزیكه‌ی 40 هه‌زار دۆلار ده‌بێت و به‌ئه‌گه‌ری زۆر ساڵی 2024 بخرێته بازاڕه‌وه
