وه‌زیری كۆچ و كۆچبه‌رانی عیراق سوپاسی هه‌رێمی كوردستان ده‌كات بۆ میوانداری و پێشوازیكردن له ئاواره‌كان به‌بێ جیاوازیكردن له‌نێوانیاندا.
رۆژی یه‌كشه‌ممه 26ی ته‌مموز ئیڤان فایه‌ق وه‌زیری كۆچ و كۆچبه‌رانی عیراق سه‌ردانی هه‌ولێری كرد و به جیا له‌گه‌ڵ به‌رپرسانی هه‌رێمی كوردستان كۆبۆوه و گفتوگۆ ده‌رباره‌ی دۆخی كۆچبه‌ران و ئاواره‌كان له هه‌رێمی كوردستان كرا.
له كۆبونه‌وه‌شیدا له‌گه‌ڵ مه‌سرور بارزانی سه‌رۆكی حكومه‌تی هه‌رێمی كوردستان، ئیڤان فایه‌ق سوپاسی هه‌رێمی كوردستانی كردوه بۆ میوانداریكردنی ئاواره و په‌نابه‌ران، كه به‌بێ هیچ جیاوازییه‌ك پێشوازی لێكردون و خزمه‌تگوزاری پێشكه‌ش كردوون. ئاماده‌یی وه‌زاره‌ته‌كه‌یشی ده‌ربڕیوه بۆ هه‌ر هه‌ماهه‌نگیه‌كی پێویست له‌گه‌ڵ حكومه‌تی هه‌رێمدا.
له به‌رانبه‌ردا سه‌رۆكی حكومه‌تی هه‌رێم ئاماژه‌ی به‌وه داوه، سه‌رباری دۆخی سه‌ختی ئابووری، حكومه‌تی هه‌رێمی كوردستان به‌رده‌وامه له میوانداریكردنی زیاتر له ملیۆنێك و 200 هه‌زار په‌نابه‌ر و ئاواره، كه پێویسته حكومه‌تی فیدراڵ و كۆمه‌ڵگای نێوده‌وڵه‌تیی له‌و ئه‌ركه‌دا هاوكاری حكومه‌تی هه‌رێمی كوردستان بن.
مه‌سرور بارزانی راشیگه‌یاندوه، هه‌رێمی كوردستان وه‌ك هه‌میشه به نموونه‌یه‌كی گه‌شی میواندۆستی و په‌ناگه‌یه‌كی ئارام ده‌مێنێته‌وه بۆ هه‌موو ئه‌وانه‌ی له ترسی تیرۆر و تۆقاندن و چه‌وساندنه‌وه رووی تێ ده‌كه‌ن.
