ئەنجومەنی وەزیرانی هەرێم رایده‌گەیه‌نێت، لە پلان و ھەوڵەکانی بەردەوام دەبێت بۆ روبەڕوبونەوەی قەیرانی دارایی و بە تایبەتیش “دابینکردنی شایستەی دارایی موچەخۆران کە ئەرکی لە پێشینەمانە”، جه‌ختیشده‌كاته‌وه، “پێشوازی لەو کەشە ئەرێنی و لەیەکگەیشتنە دەکات، کە لە ئەنجامی گفتوگۆی نێوان لایەنە سیاسییەکانی هەرێمی کوردستان هاتوەتە ئاراوە بۆ نەهێشتنی گرژییەکانی ناوخۆ”.
فەرمانگەی میدیای و زانیاری لە راگەیەندراوێكدا بڵاویکردۆته‌وه، ئەمڕۆ چوارشەممە ئەنجومەنی وەزیرانی هەرێمی کوردستان بە سەرپەرشتی مەسرور بارزانی سەرۆک وەزیرانی هەرێمی کوردستان و بەشداریی قوباد تاڵەبانی جێگری سەرۆک وەزیران، لە ڕێگەی ڤیدیۆ کۆنفرانسەوە کۆبوەوە.
ئاماژه به‌وه‌شكراوه، لە سەرەتای کۆبونەوەکەدا، سەرۆک وەزیران باسی ئەو کەشە ئەرێنی و لەیەکگەیشتنەی کرد، کە لە ئەنجامی گفتوگۆی نێوان لایەنە سیاسییەکانی هەرێمی کوردستان هاتوەتە ئاراوە بۆ نەهێشتنی گرژییەکانی ناوخۆ و بەناوی ئەنجومەنی وەزیرانەوە، دەستخۆشی لەو گفتوگۆ و دیدارانە کرد کە هەنگاوێکی گرنگە، بۆ یەکڕیزی و پشتیوانیکردنی زیاتر لە حکومەتی هەرێمی کوردستان.
ئه‌وه‌شخراوه‌ته‌ڕوو، دواتر سەرۆکی وەزیران ئاماژەی بە گرنگیی ئامادەبونی وەزیرانی حکومەت لە دانیشتنی تایبەتی پەرلەمانی کوردستاندا و بە ناوی ئەنجومەنەوە، سوپاسیکردن بۆ خستنەڕوی زانیاریی و رونکردنەوەی بابەتەکانی پەیوەست بە پرسیاری پەرلەمانتارانی کوردستان، ستایشی ئەو هەماهەنگی و کارکردن بە گیانی یەک تیمی کرد، کە لە نێو کابینەی نۆیەمی حکومەتی هەرێمی کوردستاندا هەیە.
لە راگەیەندراوەکەدا هاتووە، پاشان ھەریەک لە وەزیرە پەیوەندیدارەکان بە پێی تایبەتمەندیی، پوختەی پرسیار و سەرنجی پەرلەمانتارانیان لە دانیشتنی پەرلەمان لە رۆژانی 27- 28 ی تەمموزی 2020 بۆ ئەنجومەنی وەزیران خستەڕو، لەسەر تەوەرەکانی تایبەت بە دۆخی ناوچە کوردستانییەکانی دەرەوەی ھەرێم و بەرەنگاربونەوەی مەترسییەکانی پەتای کۆرۆنا ڤایرۆس و دواتریش بابەتی دۆخی دارایی و ئابوری ھەرێم و دوا پێشھاتەکانی دانوستان لەگەڵ حکومەتی فیدڕاڵی.
به‌پێی راگه‌یه‌ندراوه‌كه، سەرۆک وەزیران تیشکی خستە سەر دوایین ئەنجامەکانی گفتوگۆی نێوان هەرێمی کوردستان و حکومەتی فیدڕاڵی و ئاماژەی بەوە دا، کە گفتوگۆ و دانوستان بەردەوامە و حکومەتی ھەرێم دوپاتی پابەندبون بە ئیلتزامە دەستورییەکانی خۆی دەکاتەوە لە بەرامبەر دابینکردنی ماف و شایستە دەستورییەکانی ھەرێم، چەندین پێشنیاریش بۆ گەیشتن بە ڕێککەوتن ئالوگۆڕکراون و ھیوای خواست لە نزیکترین دەرفەتدا، دوای پشوەکانی جەژن بگەینە رێکەوتنێکی ھاوسەنگ کە بەرژەوەندی هەردوولای تێدا پارێزراو بێت.
ئەنجومەنی وەزیران جەختیشیکردۆته‌وه، لەسەر ئەوەی لە پلان و ھەوڵەکانی خۆی بەردەوام دەبێت بۆ روبەڕوبونەوەی قەیرانی دارایی و بە تایبەتیش دابینکردنی شایستەی دارایی مووچەخۆران کە ئەرکی لە پێشینەمانە.
له كۆتایشدا هاتووه، گفتوگۆ دەربارەی ڕێکارەکانی خۆپارێزی و ڕێنماییە تەندروستییەکانی ڕووبەڕووبوونەوەی ڤایرۆسی کۆرۆنا بە تایبەتی لە ڕۆژانی جەژنی قوربان کرا، ئەنجومەنی وەزیران ژوورەکانی ئۆپەراسیۆنی ڕاسپارد بۆ دەرکردنی ڕێکارەکانی خۆپارێزی و ڕێنمایی تەندروستی نوێ لە پێناوی پاراستنی ژیان و سەلامەتی ھاوڵاتیان.
