فه‌یسه‌ڵ عیساوى ئه‌ندامى لیژنه‌ى دارایى په‌رله‌مانى عیراق ده‌ڵێت، لیژنه‌كه‌یان ده‌ست به ئاماده‌كردنى پرۆژه‌یاساى بودجه‌ى ساڵى 2021 ده‌كات و تائێستاش حكومه‌ت پرۆژه‌كه‌ى ساڵى 2020ى نه‌ناردوه‌ته په‌رله‌مان.
فه‌یسه‌ڵ عیساوى له‌لێدوانێكى رۆژنامه‌وانیدا وتویه‌تی “لیژنه‌ى دارایى و په‌رله‌مانیش خۆیان پابه‌ند كردبو به‌وه‌ی پرۆژه‌یاساى بودجه‌ى ساڵى 2020 تێپه‌ڕێنن ئه‌گه‌ر حكومه‌ت له واده‌ى خۆیدا، كه 30ى حوزه‌یران بو، ره‌وانه‌ی په‌رله‌مانی بكردایه”.
حكومه‌تی عیراق تائێستا پرۆژه‌یاساى بودجه‌ی 2020ی نه‌ناردوه‌ته به‌رده‌م په‌رله‌مانتاران و له‌ئێستاشدا كات هاوكاریان نییه بۆ گفتوگۆكردن له‌سه‌ر پرۆژه‌كه و تێپه‌ڕاندنى.
ئه‌و په‌رله‌مانتاره ته‌ئكیدیكردوه‌ته‌وه، لیژنه‌كه‌یان ده‌ست به ئاماده‌كردنى پرۆژه‌یاساى بودجه‌ى ساڵى 2021 ده‌كات، ده‌شڵێت “تێنه‌په‌ڕاندنى پرۆژه‌یاساى بودجه‌ى هه‌ر ساڵێك كارى دامه‌زراوه‌كانى ده‌وڵه‌ت و وه‌زاره‌ته‌كان تێكده‌دات”.
