وەزیری گواستنەوە و گەیاندنی حكومەتی هەرێم ئاشكرای دەكات، لە رۆژی 1ی ئابەوە لە هەردوو فڕۆكەخانەی نێودەوڵەتی هەولێر و سلێمانیەوە گەشتە ئاسمانییەكان دەستپێدەكەنەوە.
له ڕاگەیەنراوێكدا ئانۆ جەوهەر، وەزیری گواستنەوە و گەیاندنى هەرێم ئاماژه‌ی بۆ ئه‌وه‌كردووه، دوای تەواوكردنی ئامادەكارییەكان و گرتنەبەری رێكارە تەندروستییەكان، لە ژێر رۆشنایی بڕیاری دەستەی فڕۆكەوانی شارستانی عیراقدا، لە هەرێمی كوردستانیش دەست بە گەشتە ئاسمانییەكان بۆ وڵاتانی جیهان دەكرێتەوە.
وەزیری گواستنەوە و گەیاندنی حكومەتی هەرێمی كوردستان هێمای بۆ ئه‌وه‌شكردووه، “لە رۆژی 1ی هەشتەوە گەشتەكان لە فڕۆكەخانەی نێودەوڵەتی هەولێر و سلێمانی دەستپێدەكەنەوە”، ئەمەش لە كاتێكدایە، كە زیاتر لە چوار مانگە بەهۆی بڵاوبوونەوەی ڤایرۆسی كۆرۆناوە، گەشتە ئاسمانییەكان لە فڕۆكەخانەكانی هەرێم ڕاگیراون.
