هۆشیار عەبدوڵڵا / ئەندامیی لیژنەی دارایی – ئەنجومەنی نوێنەرانی عێراق
وەڵامەکەی وەزارەتی دارایی عێراق بۆ حکومەتی هەرێم،تەئکید کردنەوەیە لەسەر هەموو ئەو راستیانەی سەبارەت بە نەبونیی هیچ نیەتێکی جدی حکومەتی هەرێم بۆ رێکەوتن لەگەڵ بەغداد و کۆتاییهێنان بە کێشەی موچەی فەرمانبەران پێشتر باسمان کردوە و بە ڕاشکاوی رایگشتی کوردستانمان لێ ئاگادار کردۆتەوە.
ئەو ڕاشکاویەی لەرونکردنەوەکەی وەزارەتی دارایی عێراقدا هەیە دەگەرێتەوە بۆ خودی علی علاوی چونکە ئەو هێندەی پیاوێکی پسپۆڕ و میهەنیە هێندە سیاسیی نیە،بۆیە زۆر ئاشکرا خاڵە ناکۆکەکانی نێوان هەردو حکومەتی نوسیوە و رەخنەکانیشیی وەک خۆی گەیاندوە،ئەمەش وەک جۆرێک لە شەفافیەت پێویست و گرنگە.
ئێستا تۆپ لە قاچی حکومەتی هەرێم بەگشتی و وەزارەتیی داراییەکەیەتی بەتایبەتی کە وەڵام بدەنەوە ئایا رونکردنەوەکەی وەزارەتی دارایی عێراق راستە یاخود نا؟!بەڵام بۆ ئەوەی راستیی لای هەموان رون بێ گرنگە بە گشتیی و قسەی عام جواب نەدەنەوە بەڵکو خاڵ بخەنە سەرپیتەکان تا وێنەکە ڕون بێت.
بە ئەزمونی زیاتر لە شەش ساڵ لە نزیکەوە ئاگاداربون لەو بگرە و بەردەی رێککەوتن و رێکنەکەوتنەی نێوان هەولێر و بەغداد لام ڕونە کە دەسەلاتی سیاسیی هەرێم بە هۆی ئەوەی بونیادی لەسەر گەندەڵیی و تاڵانی دامەزراوە هێندەی چاوی لە بەردەوامیی چەتەییە هێندە چاوی لەسەر ژیانی خەڵک و رێککەوتن نیە.
