حكومەتی هەرێمی كوردستان بڕیاری دا موچەی مانگی 3ی ئەمساڵ هاوشێوەی مانگی 2 دابەش بكات و بڕی 21% ببڕێت.
ئەمڕۆ ئەنجومەنی وەزیران بە سەرۆكایەتی مەسرور بارزانی و لە رێی ڤیدیۆ كۆنفرانسەوە كۆبۆوە و بەگوێرەی زانیارییەكانی میدیای ناوخۆیی، حكومەت بڕیاری داوە هاوشێوەی مانگی شوبات، موچەی مانگی ئاداریش بە لێبڕینەوە دابەش بكات، بە جۆرێك فەرمانبەران 21%ی موچەكانیان نادرێتێ و پلە باڵاكانیش 50%.
ئەو بڕیارەی حكومەتی هەرێم لە كاتێكدایە فەرمانبەران و موچەخۆرانی هەرێم گەیشتونەتە نیوەی دووەمی مانگی 8 و جارێ موچەی مانگی 3یان وەرنەگرتوە، هەروەها پاش دوو رۆژ لە بڕیاری مستەفا كازمی سەرۆك وەزیرانی عیراق دێت، كە تا كۆتایی ئەمساڵ بڕی 320 ملیار دینار بۆ فەرمانبەرانی هەرێم دەنێرێت.
