مستەفا كازمی سەرۆك وەزیرانی عیراق رەتیدەكاتەوە پەیامی كۆماری ئیسلامی ئێران بگەیەنێتە ویلایەتە یەكگرتوەكانی ئەمریكا و دەڵێت “ئێمە لە عیراق رۆڵی پۆستەچی ناگێڕین”.
كازمی بەرلە بەڕێكەوتنی بۆ واشنتۆن، لە چاوپێكەوتنێكدا لەگەڵ ئاژانسی “ئەسۆشیەیتد پرێس” باسی لەوەكردوە، عیراق هێشتا پێویستی بە هاوئاهەنگی و هاوپەیمانییە بۆ روبەڕوبونەوەی چەند ئاستەنگێك، دەشڵێت “دەكرێت ئەمڕۆ پێویستمان بە پاڵپشتی راستەوخۆ و پاڵپشتی سەر زەوی نەبێت، بەڵكو سروشتی گۆڕدراوی هەڕەشەی تیرۆر بڕیار لە هاوئاهەنگییەكە دەدات و لەوانەش بەردەوامی راهێنان و پاڵپشتی لە بواری چەكدا”.
سەبارەت بە بەردەوامی تیرۆركردنی چالاكوانانی عیراق، وتویەتی “ئەو تاوانانە بریتین لە ئەنجامی چەندین ساڵ پێكدادان، جێگەی سەرسوڕمان نییە كاتێك تاوانكاران لێرە و لەوێ كاردەكەن بۆئەوەی ئارامی تێكبدەن، ئێمە پابەندین بە چاكسازیكردن لە دامەزراوەی ئەمنی و زیادكردنی تواناكەی بۆئەوەی بتوانێت روبەڕوی هەموو ئاستەنگەكان ببێتەوە و ئەو كەسانە بە بەرپرسیار بزانێت، كە ناتوانن هاووڵاتیانی سڤیل بپارێزن و كۆتایی بەو گروپە نایاساییانە بهێنن”.
بڕیارە رۆژی 20ی ئەم مانگە سەرۆك وەزیرانی عیراق سەردانی واشنتۆن بكات و لەگەڵ دۆناڵد ترامپ سەرۆكی ئەو وڵاتە لە كۆشكی سپی كۆببێتەوە و چەندین كۆبونەوەی تریش ئەنجام بدرێت، دەنگۆی ئەوەش هەیە كازمی نامەی تاران بگەیەنێتە كۆشكی سپی، بەڵام خۆی دەڵێت “ئێمە لە عیراق رۆڵی پۆستەچی ناگێڕین”.
ئەو دەنگۆیە لەوەوە سەرچاوەی گرتوە، كە رۆژی 17ی ئەم مانگە ئیسماعیل قائانی فەرماندەی فەیلەقی قودسی سوپای پاسدارانی ئێران سەردانی بەغدای كردوە و دیداری لەگەڵ مستەفا كازمی سەرۆك وەزیرانی عیراق ئەنجامداوە.
