لێکۆڵینەوەیەکی پەیمانگەی ئەمریکا بۆ توێژینەوەی سیاسی”IPS” ئاشکرایدەکات لەسەرەتای بڵاوبوونەوەی ڤایرۆسی کۆرۆناوە 12 گەورەترین ملیاردێرەکانی ئەمریکا بە تێکڕا سامانەکانیان بە رێژەی 40٪ بەرزبووەتەوە بەشێوەیەک 283 ملیار دۆلار هاتووەتە سەر سەرمایەکانیان و کۆی سەرمایەکەیان تریلیۆنێک دۆلاری تێپەڕاندووە.
بەگوێرەی ئەو پەیمانگەیەی ئەمریکا ئەوە جاری یەکەمە لە مێژووی ئەو وڵاتە پوختەی سەرمایەی 12 کەس تریلیۆنێک دۆلار تێپەڕێنێت. پەیمانگەکە ناوی ئەو گرووپەی ناو ناوە ” ئۆلیگارکیک دەزن”.
ئۆلیگارکیک دەزن، پێکدێت لە جێف بێزۆس، دامەزرێنەری ئەمازۆن، خاوەنی 189.4 ملیار دۆلار، بیڵ گەیتس، دامەزرێنەری مایکرۆسۆفت، خاوەنی 114 ملیار دۆلار، مارک زوکەربێرگ، سەرۆکی فەیسبووک، خاوەنی 95.5 ملیار دۆلار، وارن بەفێت، بەڕێوەبەری جێبەجێکاری بێرکشایر هازەوەی، خاوەنی 80 ملیار دۆلار ، ئیلۆن مەسک، بەڕێوەبەری جێبەجێکاری تێسلا و سپەیس ئێکس، خاوەنی 73 ملیار دۆلار، ستیڤ بالمەر، بازرگان، خاوەنی 71 ملیار دۆلار. هەروەها لاری ئەلیسۆن، بەڕێوەبەری بەشی تەکنەلۆژیای کۆمپانیای ئۆراکڵ، خاوەنی 70.9 ملیار دۆلار. لاری پەیج، یەکێک لە دامەزرێنەرانی گووگڵ، خاوەنی 67.4 ملیار دۆلار، سێرجی برین، یەکێک لە دامەزرێنەرانی گووگڵ، خاوەنی 65.6 ملیار دۆلار. ئەلیس واڵتن، کچی دامەزرێنەری بازاڕی واڵمارت، سام واڵتن، خاوەنی 62.5 ملیار دۆلار، جیم واڵتن، کوڕی بچووکی سام واڵتن، خاوەنی 62.3 ملیار دۆلار، رۆب واڵتن، کوڕی گەورەی سام واڵتن، خاوەنی 62 ملیار دۆلار.
