مسته‌فا كازمی له واشنتۆنه‌وه فه‌رمانده‌ی پۆلیسی به‌سڕه و چه‌ند به‌رپرسێكی ئه‌منیی له كاره‌كانیان دورخسته‌وه، بڕیاره‌كه‌ش په‌یوه‌ندیی به كوشتنی چالاكوانه‌كانه‌وه هه‌یه.
مسته‌فا كازمی سه‌رۆك وه‌زیرانی عیراق له ئه‌مریكاوه تویتێكی بڵاوكرده‌وه و ئاشكرایكردوه، به‌هۆی روداوه‌كانی كوشتنی ئه‌مدواییه‌وه، فه‌رمانده‌ی پۆلیسی به‌سڕه و ژماره‌یه‌ك له به‌رپرسه ئه‌منییه‌كانی له كاره‌كانیان دورخستوه‌ته‌وه و چی پێویست بێت ده‌یكه‌ن بۆئه‌وه‌ی هێزه ئه‌منییه‌كان ئه‌ركه‌كانیان به‌جێبهێنن.
كازمی دوپاتیكردوه‌ته‌وه، ده‌ستشلكردن له‌گه‌ڵ بكوژان و ملكه‌چكردن بۆ هه‌ڕه‌شه‌كانیان ره‌تكراوه‌یه و هه‌رچییه‌ك پێویست بێت ده‌یكه‌ن بۆئه‌وه‌ی هێزه‌كانی وه‌زاره‌تی ناوخۆ و ئاسایش ئه‌ركی دابینكردنی ئاسایشی كۆمه‌ڵگه له‌به‌رانبه‌ر هه‌ڕه‌شه‌ی له‌یاساده‌رچوه‌كان به‌جێبگه‌یه‌نن.
له چه‌ند رۆژی رابردودا، له به‌سڕه خانمه چالاكوانێكی مه‌ده‌نی به‌ده‌ستی چه‌كدارانی نه‌ناسراو كوژرا، كه روداوی له‌و شێوه‌یه بۆ چه‌ندجارێكه له‌و پارێزگایه دوباره‌ده‌بێته‌وه، بۆیه كازمی ئه‌و بڕیاره‌ی داوه.
