شارەزایانی زانكۆی هۆنگ كۆنگ ئاشكرایانكردوە، بەشێوەیەكی فەرمی یەكەم حاڵەتی دووجار توشبون بە ڤایرۆسی كۆرۆنایان تۆماركردوە.
بەشی “مایكرۆبایەلۆجی” لە زانكۆی هۆنگ كۆنگ لە بەیاننامەیەكدا بڵاویكردوەتەوە، بەشێوەیەكی فەرمی یەكەم حاڵەتیان تۆماركردوە، كە توشبویەكی ڤایرۆسی كۆرۆنا دووجار توشی پەتاكە بوە و چەند مانگێكیش لەنێوان هەردوو جارەكەدا هەبوە.
بەپێی لێكۆڵینەوەكان، جیاوازی كات لەنێوان توشبونی یەكەمجار و دووەمجار چوار مانگ و 15 رۆژە، كەسەكە هەر جارە و توشی نەوەیەكی نوێی ڤایرۆسەكە بوە، بۆیە بەرگری دژی ڤایرۆسەكە لای مرۆڤەكان نامێنێتەوە و لە ئەگەری دروستكردنی ڤاكسینیش پێویستە توشبوەكانی پێشو وەریبگرن.
ئەو كەسەی دووجار توشبوە، گەنجێكی تەمەن 33 ساڵی هۆنگ كۆنگە و یەكەمجار لە 26-3ی ئەمساڵی توشبوە و نیشانەكانی قورس بون و دواتر چاكبوەتەوە، دووەمجاریش لە 15-8 توشبوەتەوە، بەڵام دووەمجار نیشانەكانی تێدا دەرنەكەوتوە.
لە چەندین ناوچەی تری جیهانیش باس لەوەكراوە چەند كەسێك دوجار توشبون، بەڵام دڵنیانەكراونەتەوە، تائێستا بابەتی دروستكردنی بەرگری دژی كۆرۆنا جێی پرسیارە و زانایان دەڵێن، هێشتا زووە بۆ دەرهێنانی ئەنجام لەسەر ڤایرۆسەكە و قورسە لەسەر یەك حاڵەت ئەنجام دەربهێنرێت.
