دۆناڵد ترامپ بە فەرمی كاندیدكردنەوەی لەلایەن كۆماریـیەكانەوە بۆ پـۆستی سەرۆكایەتی ئەمریكا پەسەندكرد و هوشداری دا ئەگەربێت و دیموكراتەكان هەڵبژاردنەكان ببنەوە ئەوا ئەمریكا بەرەو سۆشیالستی و لەناوچوون دەبەن.
دۆناڵد ترامپ لە دوایـین شەوی كۆنگرەی كۆماریـیەكاندا، بە ئامادەبوونی سەدان كەس وتاری پەسەندكردنەكەی بۆ كاندیدی سەرۆكایەتی پـێشكەش كرد و وتی” بە دڵێكی پڕ لە سوپاس و گەشبینیەكی بێ سنوور، بە شانازیـیەوە كاندیدكردنم بۆ پـۆستی سەرۆكی ئەمەریكا پەسەند دەكەم.”
وتیشی، ئەم هەڵبژاردنە بڕیار دەدات ئایە خەونی ئەمەریكایـیەكان ڕزگاری دەبێت و دەمێنێتەوە یان ئەجێندای سوشیالیستی لەناوی دەبات. باسی لەوەشكرد، ئەم هەڵبژاردنە بڕیار دەدات ملیۆنان هەلی كار بە موچەی زۆرەوە بە خێرایی دابینبكرێن یان پـیشەسازی ئەمەریكا نەمێنێت و ملیۆنان كار بەرەو دەرەوەی ئەمەریكا ببرێن.
ترامپ جەختیشیكردەوە، ” دەنگی هاوڵاتیان بڕیار دەدات یان ئەوەتا پارێزگاری لەو ئەمریكایـیانە دەكەین كە پابەندی یاسا دەبن یانیش ڕێگە بە گێرشێوێن و تاوانكاران دەدەین هەڕەشە لە هاوڵاتیانمان بكەن.”
لەمانگی تشرینی دووەمی ئەمساڵدا هەڵبژاردنی سەرۆكایەتی ئەمریكا بەڕێوەدەچێت و جۆ بایدن كاندیدی دیموكراتەكان ركابەری ترامپ دەكات لەو هەڵبژاردنەدا.
