دو پەرلەمانتاری كورد لە پەرلەمانی عێراق داوا لە مستەفا كازمی سەرۆك وەزیرانی عێراق دەكەن، چاودێرییەكی وردی ئەو پارەیە بكەن كە بۆ موچەی فەرمانبەرانی هەرێمی كوردستانی دەنێرن، لە كاتی هەر رێككەوتنێكیش لەگەڵ هەرێم مەرجی ئەوە دابنێن كە موچە لە كاتی خۆی و بە بێ لێبڕین دابەشبكرێت.
غالب محەمەد و سەركەوت شەمسەدین، دو پەرلەمانتاری كورد لە پەرلەمانی عێراق، لە نوسراوێكدا كە ئاڕاستەی مستەفا كازمی، سەرۆك وەزیرانی عێراقیان كردوە، سەبارەت بە رێككەوتنی ئەم مانگەی نێوان بەغداو هەولێر لەسەر ناردنی بڕە پارەیەك بۆ موچەخۆرانی هەرێمی كوردستان لە لایەن حكومەتی عێراقەوە، رایانگەیاندووە،”سەرەڕای ناردنی 320 ملیار دینار لەلایەن بەغدادەوە بەڵام حكومەتی ھەرێم ھێشتا لە كاتی خۆیدا موچە دابەش ناكات و ھەروەھا موچەكەش بە لێبڕینی 21% دابەشدەكرێت، لە كاتێكدا بەڵگەی تەواو لەبەردەستە كە داھاتی ناوخۆو نەوت و خاڵە سنورییەكان لەگەڵ ئەو پارەیەی لە بەغداد دێت بەشی موچە دەكات بەبێ لێبڕین.”
غالب محەمەدو سەركەوت شەمسەدین داواش لە مستەفا كازمی دەكەن “چاودێرییەكی وردی ئەو پارەیە بكەن كە ڕەوانەی ھەرێمی كوردستانی دەكەن كە دەبێت تەنیا بۆ موچە بەكاربھێنرێت، ھەروەھا دیوانی چاودێری دارایی فیدراڵ رابسپێرن بۆ وردبینی تەواوی داھاتی ناوخۆی هەرێم.”
هەروەها داواش دەكەن لەكاتی ئەنجامدانێكی هەر رێككەوتنێكدا لەگەڵ هەرێم، مەرجی یەكەمی حكومەتی عێراق دابەشكردنی موچەی فەرمانبەرانی هەرێم بێت لە كاتی خۆیداو بەبێ هیچ لێبڕینێك.
