مەسرور بارزانی سەرۆكی حكوومەتی هەرێمی كوردستان رایگەیاند كە هەرێمی كوردستان نەك 17%ی بەشە بودجەی گشتی لە عێراق وەرنەگرتووە، بەڵكو كەمتر لە 5%ی بودجەی گشتیی عێراقی پێدراوە، بەڵام بەم بەشە كەمەش هەرێمی كوردستانی بووژاندەوە.
سەرۆكی حكوومەتی هەرێمی كوردستان لە میانی دیدارێكی تەلەڤزیۆنیدا لەگەڵ ژمارەیەك كەناڵی عێراقی و عەرەبی، ڕەخنەی لە حكوومەتەكانی عێراق گرت بەوەی نەك 17%ی بەشە بودجەیان نەداوەتە هەرێمی كوردستان، بەڵكو بە شێوەیەكی نایاسایی بەشە بودجەی هەرێمیان بۆ 12.6% كەم كردەوە، دواتریش لە ڕاستیدا كەمتر لە 5%ی بودجەی عێراقیان بۆ هەرێمی كوردستان دەنارد، چونكە هەر لە بنەماوە 45%ی بودجەكەیان بە ناوی خەرجیی سیادییەوە بۆ خۆیان دەبرد.
مەسرور بارزانی گوتی بێویژدانیە كە بڵێن هەرێمی كوردستان لەسەر حیسابی ناوچەكانی تری عێراق بووژاوەتەوە، ئەوەی واش دەڵێ با پەلە بكات لە ئەنجامدانی سەرژمێریی دانیشتوان، تا بابەتەكە ڕوون بێتەوە. لە كاتێكدا هەرێمی كوردستان نەك 17%ی بەشە بودجەی لە عێراق وەرنەگرتووە، بەڵكو كەمتر لە 5%ی بودجەی گشتیی عێراقی پێدراوە، بەڵام بەم بەشە كەمەش هەرێمی كوردستانی بووژاندەوە، پێویستە بپرسین عێراق چی لەو 95%ی بودجەی ساڵانەی كردووە؟
سەرۆكی حكوومەتی هەرێمی كوردستان گوتیشی عێراق نەك هەر قەرەبووی هەرێمی كوردستانی نەكردەوە بەرانبەر هێرشەكانی سەدام حوسێن سەرۆكی لەسێدارەدراوی عێراق، بەڵكو لە بەرانبەر ئەو دوو ملیۆن ئاوارە و پەنابەرەی ڕوویان لە هەرێمی كوردستانیش كرد، حكوومەتی بەغدا خۆی لە بەرپرسیارییەتی دزیەوە.
