سێ خوشكی سیانە لە پارێزگای سیواسی توركیا لە دوای ئەوەی لە تاقیكردنەوەكانی كۆتا قۆناغی ئامادەیی ساڵی خوێندنی 2019-2020 نمرەی بەرزیان هێنا، توانییان پێكەوە كۆلێژی پزیشكی بەدەستبهێنن.
لە دوای ئەو سەركەوتنە گەورەیە، پارێزگاری سیواس، ساڵح ئایهان خەڵاتی ئەو سێ خوشكە سیانەیەی كرد.
بەپێی ئەو راگەیەندراوەی لە پارێزگای سیواس بڵاوكراوەتەوە، ئەو سێ خوشكە سیانەیە بە ناوەكانی سەنا، بەیزانور و فەیزا كۆكسال بە درێژای ژیانی پەروەردەییان هەمیشە لە یەك پۆلدا خوێندویانە و ئێستاش هەر سێكیان توانیویانە كۆلێژی پزیشكی بەدەستبهێنن، بەڵام ئەمجارە لە سێ زانكۆی جیاواز ناویان بۆ كۆلێژی پزیشكی گەڕاوەتەوە. سەنا كۆكسال بە ناوی خوشكەكانییەوە بۆ رۆژنامەنوسان وتی “قۆناغی خۆئامادەكردن بۆ تاقیكردنەوەكان زۆر بە سەختی تێپەڕی. ئێمە هەر سێكمان پێكەوە خۆمان ئامادەكرد. پێكەوە زۆرمان خوێند، زۆر دڵخۆشین بەوەی هەرسێكمان سەركەوتنمان بەدەستهێناوە”.
هاوكات بەیزانور كۆكسال وتی “تا ئەم ساتە هەمیشە لەگەڵ خۆشكەكانم پێكەوە بوین و ئیتر لەمەودا دەبێت جیاببینەوە. ئەمەش دەبێتە ئەزمونێكی جیاواز بۆمان”.
