وەزیری كارەبای هەرێم ئاشكرایكرد، بڕی ئەو كارەبایەی لە هەرێمەوە بۆ عیراق دابیندەكرێت، گەیشتوەتە 500 مێگاوات و لەرێگەی كۆمپانیاكانی كار و قەیوانەوە بۆیان دابیندەكرێت، هیچ كاریگەرییەكیشی لەسەر كاتژمێرەكانی پێدانی كارەبای نیشتمانی لە هەرێم نییە.
كەمال محەمەد وەزیری كارەبای هەرێمی كوردستان راگەیەندراوێكی بڵاوكردەوە، دەڵێت، بە كۆی گشتی 500 مێگاوات كارەبای زیادە بۆ عیراق دابیندەكرێت و لە رێكەوتی 28ی تەمموزی ئەمساڵەوە، لە رێگەی هەردوو كۆمپانیای كار و قەیوانەوە، ئەو بڕە لە كارەبا نێردراوە بۆ عیراق زیادكراوە، لە بەرامبەردا حكومەتی عیراق پارەی ئەو بڕە كارەبایە دەداتە هەردوو كۆمپانیای كار و قەیوان و سوتەمەنی پێویستیش بۆ ئەو بڕە زیادەیە دابیندەكات.
وەزیری كارەبای هەرێم ئاماژەی بەوەشكردووە، ئەو 500 مێگاواتەی دەدرێتە تۆڕی نیشتیمانی عیراق لە ژمارەیەك یەكەی وێستگەكان بەرهەمدەهێندرێت، كە پێشتر بەهۆی نەبوونی سوتەمەنی پێویستەوە لەكار وەستابوون، بۆیە بەرهەمهێنان و ناردنی ئەو بڕە زیادەیەی كارەبا لە هەرێمەوە بۆ عیراق، كاریگەریی نابێت لەسەر ژمارەی كاتژمێرەكانی پێدانی كارەبا بە هاونیشتیمانیانی هەرێم.
